ປະກາດຮັບຮອງເອົາຮ່ອງຮອຍປະຫວັດສາດ ເສັ້ນທາງສາຍພູຫຼວງ – ເສັ້ນທາງ ໂຮ່ຈີມິນ ເບື້ອງດິນລາວ ເປັນມໍລະດົກແຫ່ງຊາດ ລະດັບຊາດ ແຫ່ງ ສປປ ລາວ

ພິທີຮັບຮອງເອົາຮ່ອງຮອຍປະຫວັດສາດ ເສັ້ນທາງສາຍພູຫຼວງ – ເສັ້ນທາງ ໂຮ່ຈີມິນ ເບື້ອງດິນລາວ ເປັນມໍລະດົກແຫ່ງຊາດ ລະດັບຊາດ ແຫ່ງ ສປປ ລາວ, ຈັດຂຶ້ນໃນວັນທີ 22 ສິງຫາ 2025 ທີ່ ສະໂມສອນກົມໃຫຍ່ການເມືອງກອງທັບ, ໂດຍການເຂົ້າຮ່ວມຂອງສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະຊາຊົນປະຕິວັດລາວ, ຮອງປະທານປະເທດ ແຫ່ງ ສປປ ລາວ, ມີສະຫາຍ ນາງ ຫວໍ ທິ ແອັງ ຊວນ ກຳມະການສູນກາງພັກຄອມມຸນິດ ຫວຽດນາມ, ຮອງປະທານປະເທດ ແຫ່ງສາທາລະນະລັດສັງຄົມນິຍົມ ຫວຽດນາມ, ມີສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງປ້ອງກັນປະເທດ, ມີບັນດາສະຫາຍກຳມະການສູນກາງພັກ, ຄະນະຜູ້ແທນຂັ້ນສູງພັກ-ລັດ, ກອງທັບ ຫວຽດນາມ ແລະ ລາວ ຄະນະນໍາສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດ, ກະຊວງປ້ອງກັນຄວາມາສະຫງົບ ແລະ ສະຖານເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວເຂົ້າຮ່ວມ.

ກ່ອນຈະເລີ່ມຕົ້ນເຂົ້າສູ່ພິທີທາງການ ໄດ້ຮັບຊົມການສະແດງຈາກກອງສິລະປະກອນກອງທັບ ເຊິ່ງສະແດງໃຫ້ເຫັນຜົນງານ ແລະ ມູນເຊື້ອຕະຫຼອດໄລຍະຜ່ານມາຂອງ 2 ຊາດລາວ ແລະ ຫວຽດນາມເປັນປະເທດເພື່ອນມິດຍຸດທະສາດ, ມີອຸດົມການອັນດຽວກັນ, ມີມູນເຊື້ອສາມັກຄີຊ່ວຍເຫຼືອເຊີ່ງກັນ ແລະ ກັນ.

ໃນໂອກາດອັນມີຄວາມໝາຍສຳຄັນນີ້, ສະຫາຍ ພົນຕີ ວົງສອນ ອິນປານພິມ ຮອງເລຂາຄະນະພັກກະຊວງ ຮອງລັດຖະມົນຕີ, ຫົວໜ້າກົມໃຫຍ່ການເມືອງກອງທັບປະຊາຊົນລາວ ໄດ້ລາຍງານໂດຍຫຍໍ້ຜົນສໍາເລັດການເຄື່ອນໄຫວ ລົງສໍາຫຼວດ ແລະ ສ້າງເປັນເອກະສານມູນເຊື້ອຮ່ອງຮອຍປະຫວັດສາດເສັ້ນທາງສາຍພູຫຼວງ – ເສັ້ນທາງໂຮ່ຈີມິນ ເບື້ອງດິນລາວ ເຊິ່ງໄດ້ກ່າວວ່າ: ລາວ ແລະ ຫວຽດນາມ ເປັນປະເທດບ້ານໃກ້ເຮືອນຄຽງ, ເປັນເພື່ອນມິດຍຸດທະສາດ, ມີອຸດົມການອັນດຽວກັນ, ມີມູນເຊື້ອສາມັກຄີຊ່ວຍເຫຼືອເຊີ່ງກັນ ແລະ ກັນ, ຄຽງບ່າຄຽງໄລ່ກັນຕໍ່ສູ້ຕ້ານກັບສັດຕູຜູ້ຮຸກຮານໂຕດຽວກັນ. ເພື່ອຕອບສະໜອງກັບຄວາມຮຽກຮ້ອງຕ້ອງການຂອງພາລະກິດຕໍ່ສູ້ປົດປ່ອຍຊາດ ຕ້ານກັບ ການຮຸກຮານຂອງຈັກກະພັດອາເມລິກາ, ມາຮອດເດືອນ 12 ປີ 1960 ສູນກາງພັກປະຊາຊົນລາວ (ພັກປະຊາຊົນປະຕິວັດລາວໃນປັດຈຸບັນ) ແລະ ພັກແຮງງານຫວຽດນາມ (ພັກຄອມມູນິດຫວຽດນາມປັດຈຸບັນ), ໄດ້ຕົກລົງເປັນເອກະພາບ ສຳຫຼວດ ແລະ ກໍ່ສ້າງເສັ້ນທາງຍຸດທະສາດ “ເສັ້ນທາງ ໂຮ່ຈີມິນ” ຜ່ານດິນລາວຂຶ້ນ ໃນສະພາບຄວາມເປັນຈິງທາງດ້ານປະຫວັດສາດ ມັນໄດ້ພິສູດໃຫ້ພວກເຮົາເຫັນແລ້ວວ່າ: ເສັ້ນທາງ ໂຮ່ຈີມິນ ຜ່ານດິນລາວ ບໍ່ພຽງແຕ່ມີພາລະບົດບາດອັນສໍາຄັນ ເປັນເສັ້ນທາງລຳລຽງ ຂົນສົ່ງຍຸດທະສາດທາງດ້ານການທະຫານ, ພະລາທິການເທົ່ານັ້ນ ແຕ່ຍັງມີບົດບາດອັນສໍາຄັນ ກາຍເປັນທີ່ໝັ້ນຍຸດທະສາດເປັນບ່ອນອີງປະກອບສ່ວນຊ່ວຍໜູນອັນສໍາຄັນໃຫ້ແກ່ການຕໍ່ສູ້ຂອງລາວ, ຂະບວນການຕໍ່ສູ້ປົດປ່ອຍຊາດຂອງປະຊາຊົນພາກໃຕ້ຫວຽດນາມ ແລະ ຂະບວນການຕໍ່ສູ້ ປະຕິວັດຂອງປະຊົນກຳປູເຈຍ, ຕີເອົາຊະນະສັດຕູຜູ້ຮຸກຮານ ກ້າວໄປເຖິງການປົດປ່ອຍພາກໃຕ້ຫວຽດນາມ ຂອງກອງທັບ ແລະ ປະຊາຊົນຫວຽດນາມອ້າຍນ້ອງ “ ເສັ້ນທາງ ໂຮ່ຈີມິນ ຜ່ານດິນລາວ ” ຍັງຖືວ່າເປັນເສັ້ນທາງຮັບໃຊ້ສະໜາມຮົບລວມ, ຂອງ 3 ປະເທດລາວ, ຫວຽດນາມ ແລະ ກຳປູເຈຍ, ກາຍເປັນມໍລະດົກໜຶ່ງຂອງການຮ່ວມສຳພັນສູ້ຮົບ ແລະ ຄວາມສາມັກຄີພິເສດ ອັນບໍລິສຸດຜຸດຜ່ອງຂອງປະຊາຊົນສອງຊາດລາວ-ຫວຽດນາມ. ເຊິ່ງເຫັນໄດ້ຄວາມໝາຍຄວາມສໍາຄັນດັ່ງກ່າວ ພັກ-ລັດຖະບານລາວ ແລະ ຫວຽດນາມ ຈິ່ງຕົກລົງມອບໝາຍໃຫ້ສອງກະຊວງປ້ອງກັນປະເທດ ສປປ ລາວ ແລະ ກະຊວງປ້ອງກັນປະເທດ ສສ ຫວຽດນາມ ແຕ່ງຕັ້ງຄະນະຮັບຜິດຊອບຮ່ວມກັນ ລົງສໍາຫຼວດ, ເກັບກຳບັນດາຮອງຮອຍທາງປະ ຫວັດສາດ ຕາມແລວເສັ້ນທາງ ສາຍພູຫຼວງ-ເສັ້ນທາງໂຮ່ຈີມິນຜ່ານດິນລາວ ເລີ່ມມາແຕ່ ປີ 2023 – 2024 ຈິ່ງສໍາເລັດ, ຜົນສໍາເລັດຂອງໂຄງການດັ່ງກ່າວຄະນະສໍາຫຼວດທັງສອງຝ່າຍ (ລາວ-ຫວຽດນາມ) ໄດ້ຮ່ວມກັນລົງສໍາຫຼວດຕົວຈິງແຕ່ວັນທີ 23 ມີນາ 2023 – 09 ເມສາ 2023, ເປົ້າໝາຍລົງສໍາຫຼວດມີ 19 ຈຸດ ທີ່ນອນຢູ່ໃນ 7 ແຂວງ ພາກກາງ ແລະ ພາກໃຕ້ ຂອງລາວຄື: ແຂວງບໍລິຄໍາໄຊ, ແຂວງຄໍາມ່ວນ, ແຂວງສະຫວັນນະເຂດ, ແຂວງສາລະວັນ, ແຂວງເຊກອງ, ແຂວງຈຳປາສັກ ແລະ ແຂວງອັດຕະປື, ແຕ່ຄະນະລົງສໍາຫຼວດໄດ້ພຽງແຕ່ 18 ຈຸດ ຍັງອີກ 1 ຈຸດ ບໍ່ສາມາດເຂົ້າເຖິງໄດ້ຍ້ອນຫຼາຍປັດໃຈ. ການລົງສໍາຫຼວດແມ່ນພົບຄວາມຫຍຸ້ງຍາກຫຼາຍດ້ານ ເຊັ່ນ ວ່າ ມີບາງຮ່ອງຮອຍກໍຖືກລຶບ ແລະ ມີການປ່ຽນແປງໄປຕາມການເວລາ, ບາງຮ່ອງຮອຍກໍຖືກປະຊາຊົນ ນໍາໃຊ້ເຮັດການຜະລິດ ແຕ່ຄະນະໄດ້ເຮັດສຳເລັດການສໍາຫຼວດບັນດາຈຸດຮ່ອງຮອຍຕາມແຜນການ. ຈາກນັ້ນ ຈຶ່ງໄດ້ຮວບຮວມຂໍ້ມູນດ້ານຕ່າງໆ ເພື່ອສ້າງເປັນເອກະສານສໍາຄັນຢັ້ງຢືນທາງປະຫວັດສາດ, ນໍາສະເໜີລັດຖະບານ ແລະ ກະຊວງວັດທະນະທຳ ແລະ ທ່ອງທ່ຽວ ເພື່ອຮັບຮອງເອົາເປັນມໍລະດົກແຫ່ງຊາດ ລະດັບຊາດ ທາງດ້ານປະຫວັດສາດຂອງ ສປປ ລາວ.

ຈາກນັ້ນໃນພິທີ ສະຫາຍ ທອງລິດ ຫຼວງໂຄດ ຮອງຫົວໜ້າກົມມໍລະດົກ ກະຊວງວັດທະນະທຳ ແລະ ການທ່ອງທ່ຽວ ໄດ້ຜ່ານຂໍ້ຕົກລົງ ວ່າດ້ວຍການຮັບຮອງເອົາຮ່ອງຮອຍປະຫວັດສາດເສັ້ນທາງສາຍພູຫຼວງ – ເສັ້ນທາງໂຮ່ຈີມິນ ເບື້ອງດິນລາວ ເປັນມໍລະດົກແຫ່ງຊາດ ລະດັບຊາດ ທາງດ້ານປະຫວັດສາດຂອງ ສປປ ລາວ ຢ່າງເປັນທາງການ.

ຂ່າວ-ພາບ: ຄຳອ້າຍ ທອງວັນ