ກອງປະຊຸມສະຫຼຸບຖອດຖອນບົດຮຽນວຽກງານຂອງບັນດາກອງສື່ມວນຊົນໃນກອງທັບ ປະຈໍາ 6 ເດືອນຕົ້ນປີ 2025

ກອງປະຊຸມສະຫຼຸບຖອດຖອນບົດຮຽນການເຄື່ອນໄຫວຈັດຕັ້ງປະຕິບັດວຽກງານຂອງບັນດາສື່ມວນຊົນກອງທັບ ປະຈໍາ 6 ເດືອນຕົ້ນປີ ແລະ ວາງທິດທາງແຜນການປະຈໍາ 6 ເດືອນທ້າຍປີ 2025 ໄດ້ຈັດຂຶ້ນໃນວັນທີ 31 ກໍລະກົດ 2025 ຢູ່ທີ່ຫ້ອງປະຊຸມກອງວິທະຍຸກະຈາຍສຽງກອງທັບ ໂດຍການເປັນປະທານ ຂອງສະຫາຍ ພົນຈັດຕະວາ ແກ້ວສຸວັນ ຜາງພິລາວົງ ກໍາມະການຄະນະພັກກົມໃຫຍ່, ຫົວໜ້າກົມໂຄສະນາອົບຮົມກົມໃຫຍ່ການເມືອງກອງທັບ, ມີບັນດາສະຫາຍຄະນະກົມໂຄສະນາອົບຮົມ, ຫ້ອງການກົມໃຫຍ່, ຫ້ອງການເມືອງ, ຫ້ອງການບໍລິຫານ, ພະແນກການກົມ, ບັນດາສະຫາຍຄະນະພັກ-ຄະນະບັນຊາ 8 ກອງສື່ກອງທັບເຂົ້າຮ່ວມ.

ສະຫາຍ ພັນໂທ ພູວົງ ພົມມະລາດ ຫົວໜ້າພະແນກສື່ມວນຊົນກົມໂຄສະນາອົບຮົມ ກົມໃຫຍ່ການເມືອງກອງທັບ ໄດ້ສະຫຼຸບການເຄື່ອນໄຫວວຽກງານສື່ມວນຊົນໃນກອງທັບ ເຊິ່ງໃນ 6 ເດືອນຕົ້ນປີ 2025 ທີ່ຜ່ານມາ ຄະນະພັກ-ຄະນະບັນຊາ, ພະນັກງານ-ນັກຮົບ ຢູ່ບັນດາ ກອງສື່ມວນຊົນຂອງກອງທັບ, ມີຄວາມໜັກແໜ້ນທາງດ້ານການເມືອງ-ແນວຄິດ, ມີຄວາມເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຫ້າວຫັນຕໍ່ໜ້າທີ່ວິຊາສະເພາະ, ສຸມໃສ່ໂຄສະນາແນວທາງນະໂນບາຍຂອງພັກ-ລັດ, ຕິດຕາມການເຄື່ອນໄຫວຂອງການນໍາພັກ-ລັດ, ຄະນະນໍາກະຊວງປ້ອງກັນປະເທດ ແລະ ການເຄື່ອນໄຫວຂອງບັນດາກົມກອງໃນທົ່ວກອງທັບ, ໂດຍສະເພາະຂະບວນການສະເຫຼີມສະຫຼອງ 3 ວັນປະຫວັດສາດ ໃນປີ 2025, ຜົນສໍາເລັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງ ອົງຄະນະພັກກະຊວງປ້ອງກັນປະເທດ, ກໍຄືການຈັດຕັ້ງປະຕິບັດ 4 ຫນ້າທີ່ໃຫຍ່ 26 ແຜນງານຢ່າງເປັນຂະບວນການຟົດຟື້ນກວ້າງຂວາງ, ປະຕິບັດລະບອບປະຈຳການແຕ່ລະຂັ້ນຢ່າງເຂັ້ມງວດ ເຮັດໃຫ້ຂອບເຂດກົມກອງຮັບຜິດຊອບມີຄວາມສະຫງົບປອດໄພໂດຍພື້ນຖານ ອັນພົ້ນເດັ່ນດ້ານວຽກງານວິຊາສະເພາະ ໄດ້ສໍາເລັດການຝຶກອົບຮົມການເມືອງ ໄລຍະສັ້ນຄັ້ງທີ I, ມີພະນັກງານ-ນັກຮົບ ເຂົ້າຮ່ວມ70 ສະຫາຍ, ເຄື່ອນໄຫວຮັບໃຊ້ ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX, ງານຊາປະນາກິດສົບ ສະຫາຍ ພົນເອກ ຄຳໄຕ ສີພັນດອນ, ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 70 ປີ, ຮັບໃຊ້ພິທີພົບປະມິດຕະພາບສອງຊາດ ລາວ-ຫວຽດນາມ, ພິທີສະເຫຼີມສະຫຼອງ ວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ ແລະ ຂະບວນການວຽກງານອຶ່ນໆ ເຜີຍແຜ່ອອກສູ່ສັງຄົມຢ່າງມີຜົນສໍາເລັດອັນຈົບງາມ.

ໃນກອງປະຊຸມຍັງໄດ້ປະກອບຄໍາຄິດຄໍາເຫັນຢ່າງກົງໄປກົງມາເພື່ອເຮັດໃຫ້ການເຄື່ອນໄຫວວຽກງານສື່ມວນຊົນກອງທັບໃນ 6 ເດືອນທ້າຍປີ 2025 ໃຫ້ໄດ້ຮັບຜົນດີກວ່າເກົ່າ.

ໂອກາດນີ້ ສະຫາຍ ພົນຈັດຕະວາ ແກ້ວສຸວັນ ຜາງພິລາວົງ ໄດ້ມີຄໍາເຫັນໂອ້ລົມ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ບັນດາກົມກອງສື່ມວນຊົນສ້າງມາໄດ້ໃນໄລຍະຜ່ານມາ ພ້ອມທັງຮຽກຮ້ອງໃຫ້ ສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ – ນັກຮົບຢ່າງຕໍ່ເນື່ອງ, ສືບຕໍ່ປັບປຸງແບບແຜນວິທີເຮັດວຽກໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງ, ປະຕິບັດຕາມລະບອບລວມສູນປະຊາທິປະໄຕເຮັດວຽກເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດຊອບຢ່າງຈະແຈ້ງ, ຍົກສູງຄຸນນະພາບຂອງການສ້າງພະນັກງານ, ຮັກສາຄວາມສາມັກຄີພາຍໃນໃຫ້ເປັນປຶກແຜ່ນ, ເພື່ອເຮັດໃຫ້ການເຄື່ອນໄຫວວຽກງານບັນດາກອງສື່ມວນຊົນໃນກອງທັບມີປະສິດທິພາບຍິ່ງໆຂຶ້ນ.

ຂ່າວ: ໄພນາລິນ