ສະເເດງສິລະປະວັນນະຄະດີ ຊົມເຊີຍກອງປະຊຸມດຳເນີນຊີວິດການເມືອງທົ່ວກອງທັບ ເເລະ ຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ.

ການສະເເດງສິລະປະວັນນະຄະດີ ຊົມເຊີຍກອງປະຊຸມດຳເນີນຊີວິດການເມືອງທົ່ວກອງທັບ ເເລະ ຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ ໄດ້ຈັດຂຶ້ນໃນຕອນເເລງຂອງວັນທີ 14 ກໍລະກົດ 2025, ຢູ່ທີ່ໂຮງລະຄອນສິລະປະກອນກອງທັບ, ໂດຍການເຂົ້າຮ່ວມຂອງສະຫາຍ ພົນໂທ ຄໍາລຽງ ອຸທະໄກສອນ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງປ້ອງກັນປະເທດ, ມີບັນດາສະຫາຍ ກຳມະການສູນກາງພັກ, ບັນດາສະຫາຍຄະນະພັກ-ຄະນະນໍາກະຊວງປ້ອງກັນປະເທດ, ບັນດາກົມໃຫຍ່, ຫ້ອງວ່າການກະຊວງ, ບັນດາສະຫາຍເລຂາ, ຮອງເລຂາ ຄະນະພັກບັນດາອົງການ, ຫ້ອງການ, ກົມອ້ອມຂ້າງກະຊວງ, ຄະນະພັກກົມກອງກຳລັງຫຼວງ-ກຳລັງທ້ອງຖິ່ນທົ່ວກອງທັບ ຕະຫຼອດຮອດພະນັກງານ-ນັກຮົບກົມກອງອ້ອມຂ້າງເຂົ້າຮ່ວມ.

ຈຸດປະສົງການສະແດງສິລະປະໃນຄັ້ງນີ້ ກໍເພື່ອເປັນການສ້າງບັນຍາກາດຕາມແຜນການກະກຽມ ແລະ ຈັດຕັ້ງສະເຫຼີມສະຫຼອງ 3 ວັນປະຫວັດສາດ ຂອງກະຊວງປ້ອງກັນປະເທດ ສະບັບເລກທີ 5757/ກປທ, ລົງວັນທີ 17/09/2024, ແຜນການຈັດຕັ້ງດໍາເນີນຊີວິດການເມືອງ ໃນໂອກາດກະກຽມກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ, ສະບັບເລກທີ 3933/ກປທ, ລົງວັນທີ 24 ມິຖຸນາ 2025, ທັງເປັນການປະກອນສ່ວນໂຄສະນາເຜີຍແຜ່ ມູນເຊື້ອ, ສິລະປະ-ວັດທະນະທຳ, ຮີດຄອງປະເພນີຂອງຊາດ, ຜົນງານອັນໃຫຍ່ຫຼວງ, ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ຕະຫຼອດໄລຍະຜ່ານມາ ເຊິ່ງລາຍການສະແດງຂອງກອງສິລະປະກອນກອງທັບທີ່ນໍາມາສະແດງໃນຄັ້ງນີ້ມີ 14 ລາຍການຄື: ເສບດົນຕຣີຄຣາຊິກ 3 ບົດເພັງ: ເພັງຈົດຈໍາບຸນຄຸນພັກ, ແດນແຫ່ງອິດສະຫຼະ, ດາວລ້ອມເດືອນ, ລະຄອນເວທີແພມົນຂອງໃຜ, ເພັງລຸງໄກສອນວິລະບູລຸດໃນດວງໃຈ, ນັກຮົບປະຊາ, ບົດຟ້ອນນັກຮົບນິລະນາມ, ເພັງຊື່ລາວດັງກ້ອງ, ຂັບກຶມມຸເຈີມອາຍ(ປະກອບຟ້ອນ), ເພັງປາກັບນໍ້າ, ລຳສີພັນດອນ(ປະກອບຟ້ອນ), ເພັງແສງສະຫວ່າງຂອງພັກ, ອ້າຍທະຫານກ້າກັ່ນ, ຊີວິດບານໃໝ່(ເພັງ ມົ້ງປະກອບຟ້ອນ), ຊາວໜຸ່ມຄູ່ກັບການພັດທະນາປະກອບເຕັ້ນ, ປືນໃຫຍ່ເຄື່ອນທັບ,ທະຫານຊາຍແດນ ເເລະ ກອງທັບລາວກ້າວເດີນ.

ໂດຍ: ສຸກສາຄອນ.