ຄະນະຜູ້ແທນຊາວໜຸ່ມກອງທັບ ເຂົ້າວາງພວງມາລາ ຢູ່ອະນຸສາວະລີນັກຮົບນິລະນາມ

ໃນວັນທີ 17 ມິຖຸນາ 2025, ຄະນະຜູ້ແທນຊາວໜຸ່ມກອງທັບ ນໍາໂດຍ ສະຫາຍ ພັນເອກ ຫົງທອງ ສີຊານົນ ຫົວໜ້າຫ້ອງການຊາວໜຸ່ມກອງທັບ ພ້ອມດ້ວຍຄະນະ ໄດ້ເຂົ້າວາງພວງມາລາ ຢູ່ອະນຸສາວະລີນັກຮົບນິລະນາມ ແລະ ວາງກະຕ່າດອກໄມ້ ຢູ່ຕໍ່ໜ້າຮູບປັ້ນຫຼໍ່ ປະທານ ໄກສອນ ພົມວິຫານ ທີ່ຫໍພິພິທະພັນ ໄກສອນ ພົມວິຫານ ນະຄອນຫຼວງວຽງຈັນ, ເນື່ອງໃນໂອກາດກະກຽມດໍາເນີນກອງປະຊຸມໃຫຍ່ຜູ້ແທນຊາວໜຸ່ມກອງທັບ ຄັ້ງທີ IX.

ການວາງພວງມາລາ ແລະ ກະຕ່າດອກໄມ້ໃນຄັ້ງນີ້ ເພື່ອລະນຶກເຖິງຄຸນງາມຄວາມດີ ຂອງນັກຮົບປະຕິວັດ, ພະນັກງານ-ນັກຮົບ ແລະ ປະຊາຊົນລາວບັນດາເຜົ່າ ທີ່ໄດ້ເສຍສະຫຼະຊີວິດ ແລະ ເລືອດເນື້ອໃນຂະບວນການຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່. ດັ່ງນັ້ນ ຄະນະນໍາທຸກຂັ້ນ ຂໍຈົດຈໍາເອົາທຸກຄໍາສອນ ແລະ ສືບຕໍ່ຄົ້ນຄວ້າ ຊອກຮູ້ຮໍ່າຮຽນເອົາທິດຊີ້ນໍາ ຂອງປະທານ ໄກສອນ ພົມວິຫານ ໃນແນວທາງຂອງພັກ, ໃຫ້ຖືກຕ້ອງ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ ຂອງພັກ-ລັດ ຢ່າງໜັກແໜ້ນ.

ຂ່າວ: ພິດສະໄໝ ແກ້ວມະຫາວົງ