6 ເດືອນຕົ້ນປີ 2025 ກົມໂຄສະນາອົບຮົມ ກົມໃຫຍ່ການເມືອງກອງທັບ ຍາດໄດ້ຜົນງານຫຼາຍດ້ານທີ່ພົ້ນເດັ່ນ

ອີງຕາມບົດສະຫຼຸບວຽກງານຮອບດ້ານ ປະຈຳ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2025 ຂອງກົມໂຄສະນາອົບຮົມ ສະຫາຍ ພັນເອກ ແສງອາລຸນ ແກ້ວສະຫວ່າງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບໃຫ້ຮູ້ວ່າ: ໃນ 6 ເດືອນຕົ້ນປີ 2025 ກົມໂຄສະນາອົບຮົມ ສາມາດຍາດໄດ້ຜົນສຳເລັດຫຼາຍດ້ານທີ່ພົ້ນເດັ່ນ ເປັນຕົ້ນແມ່ນ ໄດ້ເອົາໃຈໃສ່ສຶກສາອົບຮົມການເມືອງນໍາພາແນວຄິດໃຫ້ພະນັກງານສະມາຊິກພັກ-ນັກຮົບ ຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ-ລັດ ແຕ່ລະໄລຍະ, ກຳແໜ້ນ ຂໍ້ກຳນົດກົດລະບຽບຂອງກອງທັບ, ເອກະສານຕ່າງໆ ທີ່ສະແດງເຖິງທາດແທ້ມູນເຊື້ອຂອງຊາດ, ຂອງກອງທັບ, ມູນເຊື້ອຂອງກົມກອງໂດຍຢຶດໝັ້ນໃນການຊີ້ນໍາ-ນໍາພາຂອງພັກ-ລັດກໍຄືກະຊວງປ້ອງກັນປະເທດວາງອອກ, ອັນພົ້ນເດັ່ນກວ່າໝູ່ ແມ່ນສ້າງໄດ້ຄວາມສາມັກຄີເປັນເອກະພາບ ທັງພາຍໃນ ແລະ ພາຍນອກ ດ້ວຍຄວາມຮັບຜິດຊອບສູງ, ມີຄວາມຫ້າວຫັນ ແລະ ປະຕິບັດຕາມຂັ້ນຕອນ, ມີການປະສານສົມທົບຢ່າງກົມກຽວລະຫວ່າງພະແນກການ ແລະ ອົງການ, ກົມກອງຕ່າງໆ ທີ່ກ່ຽວຂ້ອງ ສະແດງອອກວຽກງານອົບຮົມໄດ້ເອົາໃຈໃສ່ຕິດຕາມ, ເກັບກຳສະພາບການເມືອງ-ແນວຄິດ, ຫາງສຽງສັງຄົມ; ກວດກາແຜນການ ແລະ ຊຸກຍູ້ການຈັດຕັ້ງສຶກສາອົບຮົມການເມືອງ-ແນວຄິດ ປະຈໍາປີ 2025 ຢູ່ບັນດາອົງການ, ກົມກອງ-ທ້ອງຖິ່ນ ໃນທົ່ວກອງທັບ, ວຽກງານໂຄສະນາ ພົ້ນເດັ່ນໄດ້ສ້າງຮ່າງແຜນການ, ຂໍ້ຕົກລົງ ແລະ ເນື້ອໃນເອກະສານຕ່າງໆ ຮັບປະກັນໃຫ້ແກ່ບັນດໍາເນີນຊີວິດ ການເມືອງທົ່ວກອງທັບ ໃນໂອກາດສະເຫຼີມສະຫຼອງ 03 ວັນປະຫວັດສາດ, ຕິດຕາມ, ຊຸກຍູ້ການຈັດຕັ້ງເປີດຂະບວນການແຂ່ງຂັນຮັກຊາດ ແລະ ພັດທະນາ, ການຈັດຕັ້ງໂຄສະນາ-ປາຖະກະຖາວັນສໍາຄັນຕ່າງໆ ທາງປະຫວັດສາດ ປະຈຳປີ 2025 ໃນທົ່ວກອງທັບໃຫ້ໄດ້ຕາມແຜນການ, ນອກນີ້ ຍັງໄດ້ສຸມໃສ່ວຽກງານວັດທະນະທຳ, ວຽກງານແຜນການ-ສັງລວມ, ວຽກງານສື່ມວນຊົນ, ວຽກງານຮູບເງົາ-ໂທລະໂຄ່ງ, ວຽກງານວິຈິດສິນ, ວຽກງານພົວພັນຕ່າງປະເທດ ແລະ ວຽກງານນະໂຍບາຍ ໃຫ້ມີຄຸນະພາບ ບັນລຸຕາມຄາດໝາຍ ແລະ ເຮັດສຳເລັດໜ້າທີ່-ທີ່ການຈັດຕັ້ງຂັ້ນເທິງມອບໝາຍໃຫ້.

ກອງປະຊຸມ ຍັງຜ່ານຂໍ້ຕົກລົງວ່າດ້ວຍການແຕ່ງຕັ້ງຫົວໜ້າພະແນກຮູບເງົາ-ໂທລະໂຄ່ງ, ໃນນີ້ ແຕ່ງຕັ້ງ ພັນໂທ ບຸນເຖິງ ວົງພົມ ເປັນຫົວໜ້າພະແນກຮູບເງົາ-ໂທລະໂຄ່ງ ກົມໂຄສະນາອົບຮົມ, ພ້ອມທັງໄດ້ມອບເງິນນະໂຍບາຍໃຫ້ພະນັກງານພັກຜ່ອນກິນເບ້ຍບຳນານຕື່ມອີກ.

ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 19 ສິງຫາ, ໂດຍການເຂົ້າຮ່ວມເປັນປະທານຂອງສະຫາຍ ພົນຈັດຕະວາ ແກ້ວສຸວັນ ຜາງພິລາວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາ ກົມ, ກອງ, ພະແນກການ, ຂະແໜງການ ພ້ອມດ້ວຍພະນັກງານສະມາຊິກພັກ-ນັກຮົບເຂົ້າຮ່ວມ.

ໂດຍ: ສຸກສາຄອນ