ໂຮມຊຸມນຸມໃຫຍ່ ສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ

ພິທີໂຮມຊຸມນຸມໃຫຍ່ ສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ (13 ສິງຫາ 1950 – 13 ສິງຫາ 2025) ໄດ້ຈັດຂຶ້ນວັນທີ 13 ສິງຫາ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ມີບັນດາສະຫາຍກຳມະການ ກົມການເມືອງສູນກາງພັກ, ຄະນະເລຂາທິການສູນກາງພັກ, ກຳມະການສູນກາງພັກ, ບັນດາສະຫາຍອະດີດການນໍາຂັ້ນສູງພັກ-ລັດ, ພະນັກງານປະຕິວັດອາວຸໂສ, ທູດ-ທູຕານຸທູດຈາກປະເທດເພື່ອນ ມິດ ແລະ ອົງການຈັດຕັ້ງສາກົນ, ພ້ອມດ້ວຍອົງຈັດຕັ້ງຊາວໜຸ່ມ-ເຍົາວະຊົນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດສໍາຄັນດັ່ງກ່າວ, ສະຫາຍ ທອງລຸນ ສີສຸລິດ ໄດ້ກ່າວສູນທອນພົດ ບາງຕອນສໍາຄັນວ່າ: ການສ້າງຕັ້ງ “ແນວລາວອິດສະຫຼະ” ແມ່ນເຫດການການເມືອງ ທີ່ມີຄວາມໝາຍສໍາຄັນທີ່ສຸດ ໃນປະຫວັດສາດແຫ່ງການກໍາເນີດ ແລະ ການເຕີບໃຫຍ່ຂະຫຍາຍຕົວ ຂອງຂະບວນການຕໍ່ສູ້ກູ້ຊາດ ຂອງປະຊາຊົນລາວບັນດາເຜົ່າ, ມັນແມ່ນການເຕົ້າໂຮມບັນດາກໍາລັງແຮງ ຂອງຊາດ ເຂົ້າເປັນອັນໜຶ່ງດຽວ ທີ່ເປັນກ້ອນກໍາລັງສາມັກຄີອັນແໜ້ນແກ່ນ ພາຍໃຕ້ການນໍາພາຂອງພັກ, ເປັນການກໍາເນີດຂຶ້ນ ຂອງແນວໂຮມແຫ່ງຊາດ ທີ່ເປັນຮູບປະທໍາເທື່ອທໍາອິດ ຂອງຊາດລາວ ເຊິ່ງແນວໂຮມແຫ່ງຊາດ(ປະກອບດ້ວຍທຸກຊັ້ນຄົນ, ທຸກເຊື້ອຊາດ, ທຸກຊົນເຜົ່າ, ສາສະໜາ, ທຸກເພດ-ໄວ, ເຈົ້າກົກເຈົ້າເຫຼົ່າ, ນັກຮຽນ-ນັກສຶກສາ, ປັນຍາຊົນ, ທຸກສາຂາອາຊີບ ຈາກທັງພາຍໃນ ແລະ ຕ່າງປະເທດ,….) ມີບົດບາດສໍາຄັນທີ່ສຸດ ຕໍ່ການປຸກລະດົມນໍ້າໃຈຮັກຊາດ, ປັບປຸງສະຕິຊາດ ແລະ ສະຕິເອກະພາບພາຍໃນຊາດ ທີ່ສືບກັນມາແຕ່ບູຮານນະການ. ການສ້າງຕັ້ງແນວລາວອິດສະຫຼະ ແລະ ລັດຖະບານລາວຕໍ່ຕ້ານ ບໍ່ພຽງແຕ່ເປັນຂີດໝາຍແຫ່ງການຂະຫຍາຍຕົວໃໝ່ ຂອງການປະຕິວັດລາວເທົ່ານັ້ນ, ຫາກຍັງສົ່ງຜົນສະທ້ອນອັນໃຫຍ່ຫຼວງ ແລະ ສໍາຄັນຕໍ່ການຊຸກຍູ້ພາລະກິດຕໍ່ສູ້ລວມ ຂອງປະຊາຊົນ ໃນ 3 ຊາດ ໃນແຫຼມອິນດູຈີນ ອີກດ້ວຍ, ເຮັດໃຫ້ບົດບາດອິດທິພົນ ຂອງແນວລາວອິດສະຫຼະ ໄດ້ຮັບການເຊີດຊູໃຫ້ສູງເດັ່ນຂຶ້ນ ທັງຢູ່ພາຍໃນປະເທດ ແລະ ຢູ່ເວທີສາກົນ, ພ້ອມນີ້ ສະຫາຍ ທອງລຸນ ສີສຸລິດ ໄດ້ຮຽກຮ້ອງມາຍັງປະຊາຊົນລາວບັນດາເຜົ່າ, ທຸກສາສະໜາ, ທຸກສາຂາອາຊີບ ແລະ ທຸກເພດ, ໄວ… ຈົ່ງເຊີດຊູຈິດໃຈຮັກຊາດ, ເສີມຂະຫຍາຍມູນເຊື້ອສາມັກຄີເປັນປຶກແຜ່ນ, ຊ່ວຍເຫຼືອ, ເອື້ອເຟື້ອເພື່ອແຜ່, ຕື່ນຕົວເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ.