ຍົກສູງວຽກງານພະລາທິການກອງທັບ, ເພື່ອສ້າງກຳລັງແຮງສັງລວມ, ກຽມພ້ອມເຮັດສໍາເລັດທຸກໜ້າທີ່ຕາມການມອບຂອງຂັ້ນເທິງ.

ວຽກງານພະລາທິການແມ່ນວຽກງານໜຶ່ງທີ່ສໍາຄັນທີ່ນອນຢູ່ໃນວຽກງານການທະຫານຂອງພັກ ຢູ່ພາຍໃຕ້ການຊີ້ນໍາ-ນໍາພາ ເດັດຂາດ ໂດຍກົງຮອບດ້ານຂອງຄະນະພັກກະຊວງປ້ອງກັນປະເທດ, ເຮັດໜ້າທີ່ຈັດຕັ້ງຮັບປະກັນກຳລັງຊັບ, ສະໜອງໃຫ້ກອງທັບເຮັດສໍາເລັດໜ້າທີ່ໃນທຸກສະພາບການ ເຊິ່ງໃນນີ້ ຄະນະພັກກົມໃຫຍ່ພະລາທິການກອງທັບ ເວລາໃດກໍເປັນເຈົ້າການຍົກສູງຄວາມຮັບຜິດ ຊອບຂອງຕົນ ຊີ້ນໍາກໍ່ສ້າງກໍາລັງ, ປັບປຸງແບບແຜນນໍາພາ ຕາມພາລະບົດບາດຂອບເຂດສິດ, ໜ້າທີ່ ຖືກຕ້ອງຕາມລະບຽບຫຼັກການວິຊາສະເພາະ ສອດຄ່ອງກັບສະພາບເງື່ອນໄຂຕົວຈິງ. ຮັບປະກັນໄດ້ກຳລັງແຮງສັງລວມ ຄວາມສາມາດສູ້ຮົບ, ເຮັດສຳເລັດໜ້າທີ່ຕາມຄະນະພັກຂັ້ນເທິງມອບໝາຍໃຫ້ໄດ້ເປັນຢ່າງດີ.

ສະຫາຍ ພົນຈັດຕະວາ ວົງສັກ ສີພັນດອນ ກຳມະການຄະນະປະຈຳພັກກະຊວງ ຮອງຫົວໜ້າກົມໃຫຍ່ພະລາທິການກອງທັບ ໄດ້ໃຫ້ຮູ້ວ່າ: ຕະຫຼອດສະໄໝກອງປະຊຸມໃຫຍ່ ຄັ້ງທີ V ຜ່ານມາ ໄດ້ຮັບປະກັນໃຫ້ຫຼາຍບັ້ນຝຶກອົບຮົມ, ສະແດງ, ຊ້ອມຮົບ, ເກັບກູ້ລະເບີດ, ໄພພິບັດ ແລະ ອື່ນໆ ຢູ່ພາຍໃນ ແລະ ຕ່າງປະເທດ, ການສ້າງພະລາທິການກັບທີ່ ຢູ່ບັນດາກົມກອງກໍໄດ້ຮັບຜົນກະທົບຈາກສະພາບແວດລ້ອມ ປັດໃຈພາຍໃນ ແລະ ພາຍນອກຫຼາຍ. ເປັນຕົ້ນໄພທຳມະຊາດ, ພະຍາດລະບາດ, ຄ່າເງິນກີບຕົກຕໍ່າ, ການສະໜອງກັບຄວາມຕ້ອງການ, ກົນໄກຄຸນຄ່າ ລາຄາ ສະແດງອອກຜິດປົກກະຕິ ເປັນຜົນກະທົບເຖິງຕົ້ນທຶນການຜະລິດ, ກະທົບຊີວິດການເປັນຢູ່ລ້ຽງດູທັບຢ່າງແຮງ. ເຊິ່ງຢູ່ພາຍໃຕ້ການຊີ້ນໍາ-ນໍາພາ ຂອງຄະນະພັກກະຊວງປ້ອງກັນປະເທດ ກົມໃຫຍ່ພະລາທິການໄດ້ຊີ້ນໍາ-ນໍາພາແກ້ໄຂ ຜ່ານຜ່າສະພາບວິກິດການເງິນຢູ່ບັນດາໂຮງຈັກ, ໂຮງງານຂອງກອງທັບ ເຊັ່ນ: ໂຮງງານຕັດຫຍິບເຄື່ອງແບບປະດັບຍົດຂອງກອງທັບ 2 ແຫ່ງ, ໂຮງສີເຂົ້າ, ໂຮງງານຜະລິດເຂົ້າແຫ້ງ-ເສັ້ນເຝີ ເຂົ້າປຽກ, ໂຮງງານເກີບທັນວາ, ໂຮງງານເສັ້ນດ້າຍ-ເກີບໜັງ, ໂຮງງານຫຼອງຕີນ-ແພເຊັດຕົວ, ໂຮງງານຕໍ່າແຜ່ນ-ຍ້ອມສີ, ໂຮງງານຜະລິດຢາ 104 ແລະ ຜ້າອັດປາກ, ຊີ້ນໍາການສ້າງຕັ້ງໂຮງງານນໍ້າເຊລອມ-ການຢາ, ເຟີນີເຈີເຄື່ອງເຫຼັກ, ຊີ້ນຳບໍລິສັດເຊື້ອໄຟວຽງຈັນ ແລະ ກຸ່ມສາງ, ກອງຂົນສົ່ງ, ຄຸ້ມຄອງທີ່ດິນຄ້າຍຄູ, ຊີ້ນໍາໂຮງໝໍ, ໂຮງຮຽນ, ວິທະຍາຄານການແພດ, ວິທະຍາຄານພະລາທິການ ແລະ ອື່ນໆ. ໃນຍາມວິກິດ ຄະນະພັກພວກເຮົາໄດ້ຖືສໍາຄັນເພີ່ມທະວີປຸກລະດົມຂະບວນການ ຖືເປັນສະໜາມຮົບຕໍ່ສູ້ໄພຂາດແຄນອຶດຫິວ, ກົມໃຫຍ່ພະລາທິການກອງທັບ ຊີ້ນໍາ ໂດຍກົງມີ 10 ກອງຜະລິດ; 1 ສູນຜະລິດຄົບວົງຈອນ (ໜອງໝາກຈັບ), 3 ກອງຜະລິດ ແລະ 6 ກອງ ລ້ຽງສັດໃຫຍ່ໃຫ້ຊີ້ນ; ແຕ່ລະປີກອງຜະລິດດັ່ງກ່າວກໍໄລ່ລຽງມີການໄລ່ສະເລ່ຍເຖິງ 4,5 ຕື້ກີບຕໍ່ປີ, ທັງເປັນການຕອບສະໜອງໃຫ້ສັງຄົມໄດ້ບໍລິໂພກ, ສະຖິຕິຜ່ານມາວິທີຮັບປະກັນເຂົ້າກິນລ້ຽງດູກອງທະຫານຮັບປະກັນໄດ້ 100%; ຜັກກິນກຸ້ມຕົນເອງໄດ້ 65%, ຊີ້ນກິນ 45%. ຮັບປະກັນທະຫານກິນເຂົ້າ 3 ຄາບຕໍ່ວັນຕາມລະບອບອັດຕາ, ມີເຮືອນຄົວກິນຈໍານວນໜຶ່ງ ຕົ້ມຫຸ່ງປຸງແຕ່ງດ້ວຍເຕົາອາຍນໍ້າ ເຊິ່ງເປັນການປະຢັດທາດຈູດໄໝ້, ມີເຂົ້າສານສໍາຮອງ 500 ໂຕນ, ມີຫຼາຍກົມກອງ ສ້າງລາຍຮັບໄດ້ແຕ່ 22-7 ຕື້ ກີບຕໍ່ປີ ເຊິ່ງໄດ້ມາຈາກຜົນຜະລິດ ແລະ ບໍລິການຕາມທ່າແຮງ ຂອງແຕ່ລະກົມກອງ. ອັນພົ້ນເດັ່ນກໍແມ່ນບໍລິສັດ ສະຫາຍ ພັນເອກ ສີສະຫງວນ ຜະລິດເຂົ້າດ້ວຍເຕັກນິກວິທະຍາສາດທີ່ທັນສະໄໝສະໜອງເຂົ້າກິນໃຫ້ສັງຄົມ ແລະ ກົມກອງທະຫານພາກກາງ-ພາກໃຕ້ ໄດ້ 650.000 ກິໂລກຼາມເຂົ້າສານຕໍ່ປີ; ເຫັນໄດ້ວ່າເຮັດກະສິກຳມີປະສິດທິຜົນດີ, 2 ປີຜ່ານມານີ້ ກົມໃຫຍ່ພະລາທິການກອງທັບ ຍັງໄດ້ໃຫ້ທຶນຊຸກຍູ້ການຜະລິດຂອງປະຊາຊົນຕໍ່າສາດປູນອນຮັບໃຊ້ໃຫ້ທະຫານໄດ້ຈໍານວນ 150.000 ຜືນ. ການຊີ້ນໍາບັນດາໂຮງຈັກໂຮງງານ ມີຫຼາຍຫຍີ່ຫໍ້ ຫຼາຍຜະລິດຕະພັນຢັ້ງຢືນເຖິງທັດສະນະເປັນເຈົ້າການຂອງກອງທັບເຮົາ, ທັດສະນະ ເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຫຼຸດຜ່ອນການນໍາເຂົ້າຈາກຕ່າງປະເທດຖືກຕາມທິດຊີ້ນໍາຂອງພັກ, ສ້າງເສດຖະກິດ ເອກະລາດ ເປັນເຈົ້າຕົນເອງ.

ສະຫາຍ ພົນຈັດຕະວາ ວົງສັກ ສີພັນດອນ ໃຫ້ຮູ້ຕື່ມອີກວ່າ: ໃນເງື່ອນໄຂສະພາບການຂອງໂລກ, ພາກພື້ນ, ທຳມະຊາດ ປ່ຽນແປງຄາດຄະເນໄດ້ຍາກ ງົບປະມານລັດສະໜອງ ກໍມີບາງດ້ານບໍ່ທັນພຽງພໍ. ສະນັ້ນການສ້າງພະລາທິການກັບທີ່ຢູ່ບັນດາກົມ ກອງທະຫານຍິ່ງມີບົດບາດສໍາຄັນ ແລະ ຈໍາເປັນຫຼາຍ-ຂາດບໍ່ໄດ້ ທັງແມ່ນມູນເຊື້ອ, ກອງທະຫານຕັ້ງທັບຢູ່ບ່ອນໃດ ນັບແຕ່ຂັ້ນຈຸ, ໝູ່, ໝວດກໍຕ້ອງມີການປູກຝັງລ້ຽງສັດ ຫຼືວ່າເພີ່ມພູນແກ້ໄຂຊີວິດການເປັນຢູ່ ຫຼຸດຜ່ອນການເອື້ອອີງ ແບກຫາບໃສ່ແຕ່ງົບປະມານຂອງລັດສະໜອງ, ຮຽກຮ້ອງມາຍັງຄະນະພັກ-ຄະນະບັນຊາ ແຕ່ລະຂັ້ນເພີ່ມທະວີ ແຂ່ງຂັນບົດບາດຄວາມສາມາດນໍາພາ-ຊີ້ນໍາ ຈັດຕັ້ງປະຕິບັດການສ້າງພະລາທິການກັບທີ່, ສຶກສາອົບຮົມໃຫ້ພະນັກງານ- ນັກຮົບ ເຂົ້າໃຈຢ່າງເລິກເຊິ່ງຕໍ່ກັບການຮັບປະກັນພະລາທິການລ້ຽງດູທັບ ຍົກສູງ ສົ່ງເສີມທັດສະນະຕື່ນຕົວ ປະຕິບັດຄໍາຂວັນ ຕາມທິດ: 4 ປູກ 4 ລ້ຽງ ໃຫ້ເປັນຂະບວນການຢ່າງຟົດຟື້ນແຂງແຮງ. ໃຫ້ຖືເປັນມາດຖານນໍາພາ ກວດກາສ້າງກອງເຂັ້ມແຂງໜັກແໜ້ນ ຂຸດຄົ້ນທ່າແຮງບົ່ມຊ້ອນຂອງກົມກອງໃຫ້ລວມສູນ, ຕ່ອງໂສ້ ແລະ ກາຍເປັນສິນຄ້າ, ຂໍຮຽກຮ້ອງ ທຸກພາກສ່ວນ ສັງຄົມສ້າງຄວາມຊື່ນຊົມ ພໍໃຈ ຊົມໃຊ້ຜະລິດຕະພັນພາຍໃນຂອງຄົນລາວເຮົາ ກໍຄືຂອງກອງທັບເຮົາຜະລິດໄດ້; ຍົກສູງທັດສະນະເປັນເຈົ້າຕົນເອງ ບວກກັບຂໍຂັ້ນເທິງ ຊຸກຍູ້ສົ່ງເສີມໝູນໃຊ້ເຕັກນິກວິທະຍາສາດ, ເຕັກໂນໂລຊີໃໝ່ເຂົ້າໃນວຽກງານຮັບປະກັນການຜະລິດກະສິກຳ ເຊັ່ນ: ປະສົມພັນທຽມ ສັດເຄິ່ງບົກເຄິ່ງນໍ້າ, ສັດໃຫຍ່, ງົວ, ຄວາຍ, ແກະ ແລະ ອື່ນໆ ເພື່ອຍົກສູງສະມັດຕະພາບ, ຄຸນະພາບຂອງຜົນຜະລິດໃຫ້ດີຂຶ້ນ, ໃນຕໍ່ໜ້ານີ້ຢູ່ຂັ້ນກະຊວງຍັງຕ້ອງໄດ້ຄົ້ນຄວ້າຂະຫຍາຍໂຮງງານອຸດສາຫະກຳເບົາຈໍານວນໜຶ່ງອີກທີ່ເຫັນວ່າມີຄວາມສາມາດຮ່ວມມື ແລະ ເຮັດເອງໄດ້, ໄປ ພ້ອມກັບຮັບເອົາພະລາທິການທົ່ວປວງຊົນ ແລະ ເພື່ອນມິດສາກົນ ເພື່ອກໍ່ສ້າງກອງທັບໃຫ້ເຂັ້ມແຂງ ພຽງພໍ; ຈັດຕັ້ງການຜະລິດຕ້ອງມີການສະຫຼຸບຖອດຖອນບົດຮຽນ, ປັບປຸງແກ້ໄຂບັນຫາທີ່ເປັນຈຸດ ຄົງຄ້າງ, ໄປຄຽງຄູ່ກັບການສ້າງພະລາທິການກັບທີ່ກົມກອງ.

ຂໍຮຽກຮ້ອງມາຍັງ ຄະນະພັກ-ຄະນະບັນຊາ ເພີ່ມທະວີວຽກງານກວດກາ, ຄຸ້ມຄອງ ນໍາໃຊ້ງົບປະມານ ຮ່ວງລັດສະໜອງໃຫ້ກໍຄື ກະຊວງຈັດສັນແບ່ງໃຫ້ ແຕ່ລະກົມກອງຄຸ້ມຄອງດີ, ຄຸ້ມຄອງເກັ່ງ, ໂປ່ງໃສ, ນໍາໃຊ້ວຽກຈໍາເປັນ, ຮັບປະກັນວຽກຮີບດ່ວນ ມີປະສິດທິຜົນ ແລະ ເກີດປະໂຫຍດສູງສຸດ. ຕ້ານ ແລະ ສະກັດກັ້ນຕີຖອຍທຸກບັນຫາທີ່ຈະກໍ່ໃຫ້ເກີດຄວາມເສຍຫາຍ ພາບພົດ, ບົດບາດໃນການນໍາພາຂອງຄະນະພັກ ຂັ້ນຕົນ ກໍຄືບົດບາດການນໍາພາຂອງຄະນະພັກ ກະຊວງປ້ອງກັນປະເທດ ຢ່າງຂາດຕົວ.

ໂດຍ: ຄຳອ້າຍ ທອງວັນ