ກອງປະຊຸມໃຫຍ່ຜູ້ແທນສະຫະພັນກຳມະບານທົ່ວກອງທັບ ຄັ້ງທີ VI ສຳເລັດດ້ວຍໝາກຜົນອັນຈົບງາມ

ກອງປະຊຸມໃຫຍ່ຜູ້ແທນສະຫະພັນກຳມະບານທົ່ວກອງທັບ ຄັ້ງທີ VI ໄດ້ໄຂຂຶ້ນ ແລະ ສຳເລັດລົງຢ່າງຈົບງາມ ໃນວັນທີ 30 ກໍລະກົດ 2025 , ໂດຍການເປັນປະທານຮ່ວມຂອງ ສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ຜູ້ຊີ້ນຳວຽກງານອົງການຈັດຕັ້ງມະຫາຊົນກະຊວງປ້ອງກັນປະເທດ ແລະ ສະຫາຍ ນາງ ອາລິຍາວັນ ອັກຄະວົງ ຮອງປະທານຄະນະບໍລິຫານງານ ສູນກາງສະຫະພັນກຳມະບານລາວ, ມີບັນດາສະຫາຍຄະນະນຳ 4 ກົມໃຫຍ່, ຫ້ອງວ່າການກະຊວງປ້ອງກັນປະເທດ, ກົມກອງອ້ອມຂ້າງກະຊວງປ້ອງກັນປະເທດ, ບັນດາສະຫາຍພະນັກງານອາວຸໂສບຳນານ, ແຂກຮັບເຊີນທີ່ມາຈາກສູນກາງສະຫະພັນກໍາມະບານບັນດາກະຊວງ, ອົງການ, ບໍລິສັດ, ລັດວິສາຫະກິດ, ໂຮງຈັກ, ໂຮງງານ, ກົມກອງຜະລິດ ແລະ ຜູ້ແທນກອງປະຊຸມເຂົ້າຮ່ວມ.

ພາຍຫຼັງທີ່ ສະຫາຍ ພັນເອກ ບຸນຄ່ອງ ອຸດທະຈັນດີ ກໍາມະການຄະນະບໍລິຫານງານສູນກາງສະຫະພັນກຳມະບານລາວ, ຫົວໜ້າຫ້ອງການກຳມະບານກອງທັບກ່າວເປີດກອງປະຊຸມ,ຈາກນັ້ນສະຫາຍ ພັນເອກ ໄຊຊະນະ ທຳມະສອນ ຮອງຫົວໜ້າຫ້ອງການກຳມະບານກອງທັບ ໄດ້ຂຶ້ນຜ່ານບົດລາຍງານການເມືອງທັງ 2 ພາກ, ເຊິ່ງໄດ້ຍົກໃຫ້ເຫັນເຖິງຜົນສຳເລັດໃນການຈັດຕັ້ງປະຕິບັດມະຕິກອງປະຊຸມຜູ້ແທນ ກຳມະບານທົ່ວກອງທັບຄັ້ງທີ V ໃນໄລຍະ 5 ປີຜ່ານມາ ສະຫະພັນກຳມະບານແຕ່ລະຂັ້ນໃນກອງທັບ ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານສະມາຊິກກຳມະບານຢ່າງເປັນປົກກະຕິ, ເຮັດໃຫ້ຖັນແຖວພະນັກງານ, ສະມາຊິກກໍາມະບານ-ກຳມະກອນມີ ຄວາມສະຫງົບອຸ່ນອ່ຽນທຸ່ນທ່ຽງ, ມີຄວາມເຊື່ອໝັ້ນ ແລະ ເປັນເອກະພາບສູງຕໍ່ການນໍາພາຂອງພັກ-ລັດ, ມີຄວາມໜັກແໜ້ນຕໍ່ອຸດົມການປະຕິວັດ, ມີຄວາມຕັ້ງຕໍ່ບໍລິສຸດຕໍ່ພັກ, ມີມານະຈິດປະຕິວັດບຸກ, ມີຄວາມຫ້າວຫັນຂະຫຍັນພຽນໃນການອອກແຮງງານ, ມີສະຕິເຄົາລົບກົດໝາຍຂອງລັດ, ຂໍ້ກໍານົດກົດລະບຽບຂອງກອງທັບ, ຂອງກຳມະບານຢ່າງເຂັ້ມງວດ, ອັນພົ້ນເດັ່ນແມ່ນໄດ້ປະກອບສ່ວນເຂົ້າໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງສູນກາງສະຫະພັນກຳມະບານລາວຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ແລະ ຂົງເຂດວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ການຈັດຕັ້ງປະຕິບັດ 2 ວາລະແຫ່ງຊາດ ໃນຂົງເຂດວຽກງານກຳມະບານ ແລະ ວຽກງານດ້ານອື່ນໆອີກຢ່າງມີຜົນສໍາເລັດ. ຄຽງຄູ່ກັນນີ້, ອົງການຈັດຕັ້ງກຳມະບານແຕ່ລະຂັ້ນໃນກອງທັບ ໄດ້ຕັ້ງໜ້າເຄື່ອນໄຫວວຽກງານປົກປ້ອງສິດ ແລະ ຜົນ ປະໂຫຍດອັນຊອບທຳຂອງສະມາຊິກກຳມະບານ-ກຳມະກອນ ແລະ ຜູ້ອອກແຮງງານດ້ວຍການຕິດຕາມ ແລະ ຊຸກຍູ້ ການປະຕິບັດການສ້າງສັນຍາແຮງງານລວມໝູ່ ແລະ ບຸກຄົນ, ເຂົ້າຮ່ວມປຶກສາຫາລືແກ້ໄຂຂໍ້ຂັດແຍ່ງແຮງງານ ທວງຄ່າແຮງງານໃຫ້ກຳມະກອນມູນຄ່າ 7 ຕື້ກວ່າກີບ ແລະ ເຄື່ອນໄຫວໂຄສະນາເຜີຍແຜ່ກົດໝາຍວ່າດ້ວຍກຳມະບານລາວ (ສະບັບປັບປຸງ), ກົດໝາຍແຮງງານ, ຂໍ້ກຳນົດກົດລະບຽບ, ກົດໝາຍຂອງກອງທັບ ຕາມແຜນການຂອງກົມກອງ, ເຜີຍແຜ່ຄວາມປອດໄພ ແລະ ສຸຂະພາບແຮງງານໃນສະຖານທີ່ເຮັດວຽກໃຫ້ສະມາຊິກກຳມະບານ-ກຳມະກອນ ແລະ ຜູ້ອອກແຮງງານ.

ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນຂຶ້ນປະກອບຄຳເຫັນຢ່າງກົງໄປກົງມາ ແລະ ມີບັນຍາກາດສ້າງສັນ ໂດຍຍົກໃຫ້ເຫັນຈຸດດີ ແລະ ຂໍ້ຄົງຄ້າງບັນຫາທີ່ຕ້ອງໄດ້ສຸມໃສ່ແກ້ໄຂໃນຕໍ່ໜ້າໃຫ້ໄດ້ຮັບຜົນດີ.

ໃນວາລະກອງປະຊຸມ, ຍັງໄດ້ຜ່ານຂໍ້ຕົກລົງຮັບຮອງເອົາ 5 ເປັນເຈົ້າໃຫ້ຫ້ອງການກຳມະບານກອງທັບ, ຂໍ້ຕົກລົງມອບທຸງໄຊ ແລະ ປະດັບຫຼຽນກາກຳມະບານໃສ່ທຸງໄຊ, ຂໍ້ຕົກລົງປະດັບຫຼຽນກາໃຫ້ຄະນະນໍາກະຊວງປ້ອງກັນປະເທດ, ກົມກອງລວມໝູ່ ແລະ ບຸກຄົນຜູ້ທີ່ມີຜົນງານດີເດັ່ນໃນ ໄລຍະ 5 ປີຜ່ານມາຢ່າງສົມກຽດ.

ໂອກາດດັ່ງກ່າວ ສະຫາຍ ພົນຕີ ໄພວັນ ຈັນທະພົມມາ ໄດ້ມີຄຳເຫັນໂອ້ລົມເນັ້ນໜັກ ໃຫ້ຄະນະສະຫະພັນກໍາມະບານແຕ່ລະຂັ້ນເພີ່ມທະວີວຽກງານ ສຶກສາອົບຮົມການເມືອງ-ແນວ ຄິດໃຫ້ສະມາຊິກກໍາມະບານ-ກໍາມະກອນ ແລະ ຜູ້ອອກແຮງງານໃນກອງທັບ ດ້ວຍຫຼາຍຮູບການ, ຫຼາຍວິທີການໃຫ້ສອດຄ່ອງກັບແຕ່ລະເປົ້າໝາຍ, ເໝາະສົມກັບລະດັບຄວາມຮູ້ ແລະ ເງື່ອນໄຂຕົວຈິງ, ປຸກລະດົມນ້ຳໃຈຮັກຊາດ, ຮັກການອອກແຮງງານ; ເຊື່ອໝັ້ນຕໍ່ການນຳພາຂອງພັກ, ການຄຸ້ມຄອງຂອງລັດ, ມີສະຕິເຄົາລົບກົດຫມາຍ ແລະ ລະບຽບວິໄນໃນການອອກແຮງງານ, ກ້າເຮັດ, ກ້າຮັບຜິດຊອບ, ມີຄວາມດຸໝັ່ນຂະຫຍັນພຽນ, ຊື່ສັດ, ປະຢັດອົດທົນ, ມີຄວາມສາມັກຄີເອື້ອເຟື້ອເພື່ອແຜ່ ແລະ ຊ່ວຍເຫຼືອເຊິ່ງກັນ ແລະ ກັນ, ຕັ້ງໜ້າບຸກບືນຍົກລະດັບຄວາມຮູ້, ຄວາມສາມາດຂອງຕົນໃຫ້ສູງຂຶ້ນ ເພື່ອໃຫ້ຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນສະເພາະໜ້າ ແລະ ຍາວນານ, ເອົາໃຈໃສ່ຕິດຕາມກວດກາ, ການຄຸ້ມຄອງ ແລະ ນໍາໃຊ້ແຮງງານ, ໃຫ້ຖືກຕ້ອງຕາມລະບຽບກົດໝາຍ .

ໂດຍ: ບິກໄຊ ສົມພູ