ກອງປະຊຸມເຜີຍແຜ່ແຜນການເຄື່ອນໄຫວວຽກງານການເມືອງ ຮັບປະກັນໃຫ້ແກ່ການຈັດຕັ້ງຫັດແອບກຳລັງ ສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີ

ກອງປະຊຸມເຜີຍແຜ່ແຜນການເຄື່ອນໄຫວວຽກງານການເມືອງ ຮັບປະກັນໃຫ້ແກ່ການຈັດຕັ້ງຫັດແອບກຳລັງ ສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີ ໄດ້ຈັດຂຶ້ນໃນວັນທີ 07 ກໍລະກົດ 2025, ໂດຍການເປັນປະທານຂອງສະຫາຍ ພົນຕີ ໄພວັນ ຈັນທະພົມມາ ກຳມະການຄະນະພັກກະຊວງ ຮອງຫົວໜ້າກົມໃຫຍ່ການເມືອງກອງທັບ, ມີບັນດາຄະນະພັກ-ຄະນະບັນຊາກົມ, ກອງ, ຫ້ອງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ສະຫາຍ ພັນເອກ ແສງອາລຸນ ແກ້ວສະຫວ່າງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ໄດ້ຜ່ານແຜນການເຄື່ອນໄຫວວຽກງານການເມືອງ ຮັບປະກັນໃຫ້ແກ່ການຈັດຕັ້ງຫັດແອບກຳລັງ ເຂົ້າຮ່ວມເດີນສວນສະໜາມສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ, ໂດຍອີງຕາມແຜນການ ຂອງກົມອົບຮົມ ກົມໃຫຍ່ເສນາທິການກອງທັບ ກ່ຽວກັບການຈັດຕັ້ງຫັດແອບກໍາລັງ ເຂົ້າຮ່ວມສວນສະໜາມ ສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີ. ຈຸດປະສົງ, ແມ່ນເພື່ອເຮັດໃຫ້ບັນດາກ້ອນກຳລັງຫັດແອບເຂົ້າຮ່ວມສວນສະໜາມມີຄວາມບຸກບືນຫ້າວຫັນ, ເຂົ້າຮ່ວມສວນສະໜາມດ້ວຍຄວາມເອົາໃຈໃສ່, ຮັກສາໄດ້ມູນເຊື້ອ ແລະ ບົດບາດອັນໂດດເດັ່ນ, ສະຫງ່າງາມຂອງກໍາລັງປະກອບອາວຸດ ກໍຄືກອງທັບປະຊາຊົນລາວ ທີ່ມີມາແຕ່ດົນນານ ໄດ້ຮັບການສືບຕໍ່ເສີມຂະຫຍາຍຂຶ້ນເຮັດໃຫ້ຂະບວນການວຽກງານຫັດແອບກະກຽມກ້ອນກຳລັງເຂົ້າຮ່ວມສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີ ໃນຄັ້ງນີ້ ໄດ້ຮັບຮູ້ຢ່າງແຜ່ຫຼາຍໄປທົ່ວສັງຄົມ, ຮັບຮູ້ ເຂົ້າໃຈ ແລະ ເຫັນໄດ້ຄວາມໝາຍສໍາຄັນບັນດາຂະບວນການຕ່າງໆທີ່ປິ່ນອ້ອມ ການຫ້າງຫາຫະກຽມສະເຫຼີມສະຫຼອງ ວັນດັ່ງກ່າວ ຂອງກອງທັບເຮົາ, ການຈັດຕັ້ງເຄື່ອນໄຫວ, ຊຸກຍູ້ຂະບວນການກະກຽມ ແລະ ຈັດຕັ້ງສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີ ຂອງກະຊວງປ້ອງກັນປະເທດ ໂດຍສະເພາະແມ່ນການກະກຽມຫັດແອບກ້ອນກໍາລັງເຂົ້າຮ່ວມ ສວນສະໜາມ ໃຫ້ມີຄວາມຟົດຟື້ນຕໍ່ເນື່ອງ ເຮັດໃຫ້ຂະບວນການເຫຼົ່ານັ້ນ ປະກອບສ່ວນຢ່າງຕັ້ງໜ້າເຂົ້າໃນຂະບວນການລວມຂອງຊາດ.

ໂອກາດນີ້, ສະຫາຍ ພົນຕີ ໄພວັນ ຈັນທະພົມມາ ຍັງໄດ້ໃຫ້ທິດຊີ້ນຳ, ໂອ້ລົມເນັ້ນໜັກຫຼາຍບັນຫາ ຕໍ່ຄະນະຮັບຜິດຊອບ ຕະຫຼອດຮອດພາກສ່ວນທີ່ກ່ຽວຂ້ອງຕ່າງໆ ຈົ່ງພ້ອມກັນເອົາໃຈໃສ່ຕໍ່ຄວາມຮັບຜິດຊອບຂອງຕົນເປັນໜ້າທີ່ສຳຄັນມີແບບແຜນ, ມີການປະສານສົມທົບກັນຢ່າງລະອຽດ, ຖືເອົາການສຶກສາອົບຮົມການເມືອງ – ແນວຄິດເປັນກົກ, ມີແນວຄິດຫຼັກໝັ້ນ, ອຸ່ນອ່ຽງທຸ່ນທ່ຽງຫ້າວຫັນ, ຍຶດຖືນ້ຳໃຈຮັກຊາດຮັກລະບອບໃໝ່, ມີຈິດໃຈອົດທົນຜ່ານຜ່າຄວາມຫຍຸ້ງຍາກ ພ້ອມກັນເອົາໃຈໃສ່ຮັບປະກັນວຽກງານການເຄື່ອນໄຫວຫັດແອບໃຫ້ມີລະບຽບວິໄນ, ຮັກສາໄດ້ຄວາມປອດໄພ, ເອົາໃຈໃສ່ໂຄສະນາເຜີຍແຜ່ໃຫ້ສັງຄົມ, ຮັບຮູ້, ເຂົ້າໃຈ ແລະ ເຫັນໄດ້ຄວາມໝາຍສໍາຄັນ ບັນດາຂະບວນການຕ່າງໆທີ່ປິ່ນອ້ອມ, ກໍຄືເຮັດໃຫ້ການສະເຫຼີມສະຫຼອງວັນຊາດທີ 2 ທັນວາ ມີບັນຍາກາດຟົດຟື້ນ ແລະ ກວ້າງຂວາງ.

ຂ່າວ-ພາບ: ສຸກສາຄອນ+ຄໍາໄຕ.