ສະພາແຫ່ງຊາດ ຖະແຫຼງຂ່າວກຽມໄຂກອງປະຊຸມສະໄໝສາມັນ ເທື່ອທີ 2 ຊຸດທີ X.

ໃນຕອນບ່າຍວັນທີ 01 ຕຸລາ 2026, ທ່ານ ບຸນຈັນ ສີວົງພັນ, ກຳມະການສູນກາງພັກ, ຄະນະປະຈໍາສະພາແຫ່ງຊາດ, ຫົວໜ້າຫ້ອງວ່າການສະພາແຫ່ງຊາດ ທັງເປັນຫົວໜ້າກອງເລຂາກອງປະຊຸມ ໄດ້ຕາງໜ້າໃຫ້ຄະນະປະຈໍາສະພາແຫ່ງຊາດ ຖະແຫຼງຂ່າວຕໍ່ສື່ມວນຊົນ ກ່ຽວກັບການກຽມຄວາມພ້ອມດໍາເນີນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ຕາມກົດໝາຍ ວ່າດ້ວຍສະພາແຫ່ງຊາດ ແລະ ມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 110/ຄປຈ.

ກອງປະຊຸມໃນຄັ້ງນີ້ຈະໄດ້ພິຈາລະນາ ແລະ ຕົກລົງບັນຫາສໍາຄັນຂອງຊາດ ໃນ 5 ວາລະຕົ້ນຕໍ ດັ່ງນີ້:

1. ວຽກງານບຸກຄະລາກອນ: ພິຈາລະນາ, ຮັບຮອງເອົາການເລືອກຕັ້ງບຸກຄະລາກອນຈໍານວນໜຶ່ງ.

2. ວຽກງານເສດຖະກິດ-ງົບປະມານ: ພິຈາລະນາ, ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2026 ແລະ ທິດທາງແຜນການ ປະຈໍາປີ 2027.

3. ວຽກງານກວດສອບ: ພິຈາລະນາ, ຮັບຮອງເອົາບົດລາຍງານຂອງອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2026, ທິດທາງແຜນການ ປະຈໍາປີ 2027 ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2025.

4. ວຽກງານອົງການຍຸຕິທໍາ ແລະ ກວດກາ: ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດແຜນເຄື່ອນໄຫວວຽກງານ ປະຈໍາປີ 2026 ແລະ ທິດທາງປີ 2027 ຂອງສະພາແຫ່ງຊາດ, ອົງການກວດກາແຫ່ງລັດ, ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ.

5. ວຽກງານສ້າງ ແລະ ປັບປຸງກົດໝາຍ: ພິຈາລະນາ, ຮັບຮອງເອົາ ຮ່າງກົດໝາຍ ຈໍານວນ 8 ສະບັບ (ກົດໝາຍສ້າງໃໝ່ 1 ສະບັບ ຄື: ຮ່າງກົດໝາຍວ່າດ້ວຍການປົກປ້ອງເງິນຝາກ; ແລະ ກົດໝາຍປັບປຸງ 7 ສະບັບ ຄື: ກົດໝາຍວ່າດ້ວຍລັດຖະບານ, ນາຍທະຫານກອງທັບປະຊາຊົນລາວ, ກຳລັງປ້ອງກັນຄວາມສະຫງົບປະຊາຊົນລາວ, ການບິນພົນລະເຮືອນ, ການຈໍລາຈອນທາງບົກ, ການຕ້ານ ແລະ ສະກັດກັ້ນອາຊະຍາກໍາທາງໄຊເບີ, ແລະ ການຄວບຄຸມເຄື່ອງດື່ມທີ່ມີທາດເຫຼົ້າ).

ສໍາລັບກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ຈະໄດ້ໄຂຂຶ້ນຢ່າງເປັນທາງການ ໃນລະຫວ່າງວັນທີ 5–21 ຕຸລາ 2026 ທີ່ຫ້ອງປະຊຸມໃຫຍ່ສະພາແຫ່ງຊາດ, ລວມເວລາທັງໝົດ 13 ວັນ ເພື່ອພິຈາລະນາ ແລະ ຕົກລົງບັນຫາສໍາຄັນລະດັບຊາດ. ພ້ອມດຽວກັນນີ້, ຄະນະປະຈໍາສະພາແຫ່ງຊາດ ຍັງໄດ້ຈັດຕັ້ງໜ່ວຍງານຮັບຄຳສະເໜີ ແລະ ຄຳຄິດຄຳເຫັນໂດຍກົງຈາກປະຊາຊົນໃນໄລຍະດໍາເນີນກອງປະຊຸມ ຜ່ານ 3 ຊ່ອງທາງ ຄື: ສາຍດ່ວນ 156 (ໂທຟຣີ) ໃນໂມງລັດຖະການ ແຕ່ວັນທີ 5–21 ຕຸລາ 2026; ອີເມວ nalao.156@gmail.com; ແລະ ແອັບພລິເຄຊັນ ລາວນາ (Laona).

ໃນຕອນທ້າຍ, ທ່ານ ບຸນຈັນ ສີວົງພັນ ກໍໄດ້ເຊີນຊວນປະຊາຊົນລາວບັນດາເຜົ່າທຸກຊັ້ນຄົນ ທັງຢູ່ພາຍໃນ ແລະ ຕ່າງປະເທດ ຈົ່ງພ້ອມກັນຕິດຕາມການດໍາເນີນກອງປະຊຸມດັ່ງກ່າວ ຜ່ານທາງສື່ມວນຊົນທຸກຊ່ອງທາງ.