ສໍາເລັດກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ອົງຄະນະພັກກະຊວງປ້ອງກັນປະເທດ.

ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ອົງຄະນະພັກກະຊວງປ້ອງກັນປະເທດ ໄດ້ໄຂຂຶ້ນ ແລະ ສຳເລັດລົງດ້ວຍໝາກຜົນອັນຈົບງາມ, ພາຍຫຼັງໄດ້ດຳເນີນມາເປັນເວລາ 2 ວັນ ເລີ່ມແຕ່ວັນທີ 7 ຫາ ວັນທີ 8 ສິງຫາ 2025 ທີ່ກະຊວງປ້ອງກັນປະເທດ, ພາຍໃຕ້ການເປັນປະທານຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງປ້ອງກັນປະເທດ, ໃຫ້ກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ, ປະທານຄະນະກໍາມະການ ປ້ອງກັນຊາດ-ປ້ອງກັນຄວາມສະຫງົບສູນກາງ, ມີບັນດາສະຫາຍຄະນະເລຂາທິການສູນກາງພັກ, ກໍາມະການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຄະນະພັກກະຊວງປ້ອງກັນປະເທດ, ຄະນະພັກນະຄອນຫຼວງວຽງຈັນ, ຄະນະພັກກະຊວງປ້ອງກັນຄວາມສະຫງົບ, ຄະນະພັກສະຫະພັນນັກຮົບເກົ່າແຫ່ງຊາດລາວ, ພະນັກງານປະຕິວັດອາວຸໂສ, ວິລະຊົນແຫ່ງຊາດ, ນັກຮົບແຂ່ງຂັນ ແລະ ບັນດາຜູ້ແທນສົມບູນ ທີ່ເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວກອງທັບເຂົ້າຮ່ວມ.

ສະຫາຍ ພົນໂທ ຄຳລຽງ ອຸທະໄກສອນ ໄດ້ລາຍງານຜົນສຳເລັດກອງປະຊຸມ ເຊິ່ງສະຫາຍໄດ້ໃຫ້ຮູ້ວ່າ: ກອງປະຊຸມໃຫຍ່ ໄດ້ດໍາເນີນພາຍໃຕ້ບັນຍາກາດແຫ່ງຄວາມສາມັກຄີ, ຄວາມເປັນເອກະພາບ ແລະ ຄວາມຮັບຜິດຊອບການເມືອງສູງ; ຄຽງຄູ່ກັບຄວາມສົນໃຈ ແລະ ການຕິດຕາມຢ່າງໃກ້ຊິດ ຂອງພະນັກງານ, ສະມາຊິກພັກ, ນັກຮົບໃນທົ່ວກອງທັບ, ກອງປະຊຸມໃຫຍ່ ພ້ອມກັນຄົ້ນຄວ້າ, ຕົກລົງບັນຫາສໍາຄັນຂອງ ກະຊວງປ້ອງກັນປະເທດ ດ້ວຍຄວາມເອກະພາບສູງ ແລະ ໄດ້ສິ້ນສຸດລົງດ້ວຍຜົນສໍາເລັດອັນຈົບງາມ.

ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນປະເທດໄດ້ດໍາເນີນໄປດ້ວຍບັນຍາກາດອັນຟົດຟື້ນ, ບົນພື້ນຖານຄວາມສາມັກຄີເປັນເອກະພາບສູງ, ມີຄວາມຮັບຜິດຊອບອັນເຕັມປ່ຽມຂອງບັນດາສະຫາຍຜູ້ແທນກອງປະຊຸມ ໃນການຄົ້ນຄວ້າຕົກລົງບັນຫາສໍາຄັນຕ່າງໆ ເພື່ອສືບຕໍ່ນໍາພາປັບປຸງກຳລັງປ້ອງກັນຊາດໃນຕໍ່ໜ້າ ໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.

ກອງປະຊຸມໃຫຍ່ ໄດ້ຄົ້ນຄວ້າຢ່າງເລິກເຊິ່ງກົງໄປກົງມາ ແລະ ໄດ້ຮັບຮອງເອົາ ຢ່າງເປັນເອກະສັນ ລາຍງານການເມືອງຂອງຄະນະບໍລິຫານງານພັກກະຊວງປ້ອງກັນປະເທດ ສະໄໝທີ VI ເຊິ່ງ ໄດ້ຕີລາຄາໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ໃນ 5 ປີ ຜ່ານມາ, ເຊິ່ງຍາດ ໄດ້ຜົນສໍາເລັດອັນໃຫຍ່ຫຼວງ ແລະ ຜົນງານອັນພົ້ນເດັ່ນຫຼາຍດ້ານ, ອັນໄດ້ສ້າງພື້ນຖານ ແລະ ທ່ວງທ່າໃໝ່ ທີ່ສໍາຄັນ, ເປັນປັດໃຈຍູ້ແຮງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານໃນຊຸມປີຕໍ່ໜ້າ, ສືບຕໍ່ນໍາພາກອງທັບກ້າວຂຶ້ນເຮັດສຳເລັດທຸກໜ້າທີ່. ພ້ອມກັບຜົນສໍາເລັດດັ່ງກ່າວ, ກອງປະຊຸມໃຫຍ່ ຍັງໄດ້ເປັນເອກະພາບ ຢ່າງພາວະວິໄສ ດ້ານຂໍ້ຄົງຄ້າງ, ຂໍ້ຂາດຕົກບົກຜ່ອງ ໃນການນໍາພາ-ຊີ້ນໍາຂອງຄະນະພັກກະຊວງ ກໍຄືການຈັດຕັ້ງປະຕິບັດໜ້າທີ່, ວຽກງານຈຸດສຸມບາງດ້ານ ທີ່ບໍ່ບັນລຸຜົນສໍາເລັດຕາມຄາດໝາຍທີ່ວາງອອກ, ພ້ອມທັງຊີ້ໃຫ້ເຫັນ ສາເຫດຕົ້ນຕໍ ເພື່ອກຳນົດທິດທາງມາດຕະການແກ້ໄຂທີ່ສອດຄ່ອງ ແລະ ແທດເໝາະ, ຮັບປະກັນໃຫ້ແກ່ການຫັນປ່ຽນໃໝ່ຢາງຈິງຈັງ ໃນການຈັດຕັ້ງປະຕິບັດແນວທາງຂອງພັກ ກໍຄືໜ້າທີ່ການເມືອງຂອງ ກອງທັບໃນຕໍ່ໜ້າ.

ພ້ອມນັ້ນ ກອງປະຊຸມ ຍັງໄດ້ສັງລວມບັນດາຜົນສໍາເລັດ ແລະ ບາງດ້ານຂໍ້ຄົງຄ້າງທີ່ຈະຕ້ອງໄດ້ສືບຕໍ່ເອົາໃຈໃສ່ແກ້ໄຂ, ເພື່ອຍົກລະດັບການສ້າງພື້ນຖານໃນການກໍ່ສ້າງກອງທັບໃຫ້ກາຍເປັນກອງທັບປະຕິວັດ, ມີລະບຽບແບບແຜນ ແລະ ທັນສະໄໝ.

ກອງປະຊຸມໃຫຍ່ໄດ້ເລືອກຕັ້ງເອົາຄະນະບໍລິຫານງານພັກກະຊວງປ້ອງກັນປະເທດ ສະໄໝທີ VI ຈຳນວນ 35 ສະຫາຍ ເພື່ອເປັນແກ່ນສານນໍາພາໃນທົ່ວກອງທັບ ຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນປະເທດ ໃຫ້ມີຜົນສໍາເລັດໃໝ່, ສ້າງບາດກ້າວບຸກທະລຸໃນການປັບປຸງກໍ່ສ້າງກໍາລັງປະກອບອາວຸດປ້ອງກັນຊາດໃຫ້ເຕີບໃຫຍ່ເຂັ້ມແຂງ ແລະ ປະກອບສ່ວນໃນການພັດທະນາປະເທດຊາດ. ພ້ອມນີ້, ກອງປະຊຸມໄດ້ເລືອກຕັ້ງເອົາຜູ້ແທນສົມບູນ 53 ສະຫາຍ, ສຳຮອງ 07 ສະຫາຍ ໄປຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ.

ກອງປະຊຸມຄົບຄະນະບໍລິຫານງານພັກກະຊວງ ສະໄຫມທີ VI ຄັ້ງປະຖົມມະລຶກ ໄດ້ເປັນເອກະພາບ ເລືອກຕັ້ງຄະນະປະຈຳພັກກະຊວງປ້ອງກັນປະເທດຈຳນວນ 11 ສະຫາຍ; ກອງປະຊຸມ ໄດ້ເປັນເອກະພາບຢ່າງສູງເລືອກເອົາ ສະຫາຍ ພົນໂທ ຄຳລຽງ ອຸທະໄກສອນ ເປັນເລຂາຄະນະບໍລິຫານງານພັກກະຊວງ; ພ້ອມກັນນັ້ນ ກໍໄດ້ເລືອກເອົາສະຫາຍ ພົນຕີ ວົງສອນ ອິນປານພິມ ແລະ ສະຫາຍ ພົນຕີ ສາຍໃຈ ກົມມະສິດ ເປັນຮອງເລຂາຄະນະບໍລິຫານງານພັກກະຊວງ, ໃນກອງປະຊຸມ ຍັງໄດ້ ເລືອກຕັ້ງປະທານ, ບັນດາຮອງປະທານຄະນະກວດກາພັກກະຊວງປະກອບດ້ວຍ 3 ສະຫາຍ ໂດຍແມ່ນ ສະຫາຍ ພົນຈັດຕະວາ ແສງມະນີວອນ ຄຳມະນີ ເປັນປະທານ.

ກອງປະຊຸມສຸດທີ່ພາກພູມໃຈ ແລະ ເປັນກຽດຢ່າງສູງ ໃນການໃຫ້ກຽດເຂົ້າຮ່ວມເປັນປະທານ ແລະ ໂອ້ລົມຕໍ່ກອງປະຊຸມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານ ສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ.ລາວ, ປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບສູນກາງ ເຊິ່ງສະຫາຍໄດ້ ຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງຄະນະພັກກະຊວງປ້ອງກັນປະເທດ ກໍຄືການນໍາພາ-ຊີ້ນໍາຂອງຄະນະພັກກະຊວງປ້ອງກັນປະເທດ ໃນການປັບປຸງກໍ່ສ້າງກອງທັບປະຊາຊົນລາວ ນັບມື້ນັບເຕີບໃຫຍ່ເຂັ້ມແຂງ ຕະຫຼອດໄລຍະ 76 ປີຜ່ານມາ, ພ້ອມນີ້, ຍັງໄດ້ຍົກໃຫ້ເຫັນເຖິງສະພາບການຂອງໂລກ, ພາກພື້ນ ແລະ ກົນອຸບາຍມ້າງເພຂອງສັດຕູຕໍ່ ສປປ ລາວ. ພ້ອມທັງໄດ້ເນັ້ນໜັກໜ້າທີ່ ທີ່ສໍາຄັນໃນໄລຍະໃໝ່ຂອງກອງທັບ ແລະ ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ, ຕັ້ງໜ້າສຶກສາອົບຮົມໃຫ້ ສະມາຊິກພັກ, ພະນັກງານທຸກສະຫາຍ ມີຄຸນທາດການເມືອງໜັກແໜ້ນ, ມີຄວາມເຊື່ອໝັ້ນຕໍ່ອຸດົມການປະຕິວັດ, ມີຄວາມເປັນເອກະພາບສູງຕໍ່ແນວທາງນະໂຍບາຍ ຂອງພັກ, ຕັ້ງໜ້າປັບປຸງແບບແຜນນໍາພາວິທີເຮັດວຽກໃຫ້ດີຂຶ້ນ.

ຂ່າວ-ພາບ: ຄຳອ້າຍ ທອງວັນ