ຜົນສໍາເລັດກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກ ກະຊວງປ້ອງກັນຄວາມສະຫງົບ

ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກ ກະຊວງປ້ອງກັນຄວາມສະຫງົບ ໄດ້ໄຂຂຶ້ນໃນວັນທີ 5 ສິງຫາ ແລະ ສໍາເລັດລົງໃນວັນທີ 6 ສິງຫາ 2025 ທີ່ສະໂມສອນກະຊວງປ້ອງກັນຄວາມສະຫງົບ, ໂດຍພາຍໃຕ້ການເປັນປະທານ ຂອງສະຫາຍ ພົນເອກ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບ, ໂດຍມີ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ, ມີແຂກຖືກເຊີນ, ຜູ້ແທນກອງປະຊຸມ ແລະ ພະນັກງານປະຕິວັດອາວຸໂສບຳນານ ເຂົ້າຮ່ວມ.

ສະຫາຍ ພົນເອກ ວິໄລ ຫຼ້າຄໍາຟອງ ໄດ້ລາຍງານຜົນກອງປະຊຸມ ໃຫ້ຮູ້ວ່າ: ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກ ກະຊວງປ້ອງກັນຄວາມສະຫງົບ ໄດ້ດໍາເນີນໄປດ້ວຍບັນຍາກາດອັນຟົດຟື້ນ, ກອງປະຊຸມໄດ້ສິ້ນສຸດລົງດ້ວຍຜົນສໍາເລັດອັນຈົບງາມ ສະແດງອອກດັ່ງນີ້: ກອງປະຊຸມໃຫຍ່ໄດ້ຄົ້ນຄວ້າຢ່າງເລິກເຊິ່ງ ແລະ ຮັບຮອງເອົາຢ່າງເປັນເອກະສັນ ລາຍງານການເມືອງ ຂອງຄະນະບໍລິຫານງານພັກກະຊວງປ້ອງກັນຄວາມສະຫງົບ ສະໄໝທີ V ທີ່ໄດ້ສະເໜີຕໍ່ກອງປະຊຸມໃຫຍ່ຜູ້ແທນ ຄັ້ງທີ VI ໂດຍສະແດງຄວາມເຫັນດີເຫັນພ້ອມ ຕໍ່ການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ເປັນຕົ້ນ ຜົນງານອັນພົ້ນເດັ່ນທີ່ສ້າງມາໄດ້ໃນ 5 ຂົງເຂດວຽກງານທີ່ກຳນົດໄວ້ຄື: ວຽກງານປົກປັກຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ປອດໄພທາງສັງຄົມ, ວຽກງານກໍ່ສ້າງພັກ-ພະນັກງານໃນກຳລັງປ້ອງກັນຄວາມສະຫງົບ; ວຽກງານພະລາທິການ ແລະ ປັບປຸງແກ້ໄຂຊີວິດການເປັນຢູ່ ຂອງກຳລັງປ້ອງກັນຄວາມສະຫງົບ, ວຽກງານເສນາທິການ ແລະ ພົວພັນຮ່ວມມືກັບຕ່າງປະເທດ, ບັນດາຜົນສຳເລັດດັ່ງກ່າວ ໄດ້ເປັນພື້ນຖານ ແລະ ທ່ວງທ່າໃໝ່ ໃຫ້ແກ່ການສືບຕໍ່ພັດທະນາກຳລັງປ້ອງກັນຄວາມສະຫງົບ ໃຫ້ຂະຫຍາຍຕົວຢ່າງໜັກແໜ້ນ ໄປຕາມທິດທາງ ແລະ ຈຸດໝາຍທີ່ວາງໄວ້; ພ້ອມກັນນັ້ນ, ກອງປະຊຸມໃຫຍ່ ຍັງໄດ້ໄຈ້ແຍກ ແລະ ຕີລາຄາຢ່າງເລິກເຊິ່ງ ຕໍ່ບັນດາສາເຫດທີ່ພາໃຫ້ມີຂໍ້ຄົງຄ້າງ ແລະ ຖອດຖອນໄດ້ 5 ບົດຮຽນ ຜ່ານການຈັດຕັ້ງປະຕິບັດໃນໄລຍະຜ່ານມາ ເຊິ່ງໄດ້ເລັ່ງທວງໃຫ້ມີມາດຕະການແກ້ໄຂທີ່ແທດເໝາະຢ່າງຈິງຈັງ ແນໃສ່ສ້າງການຫັນປ່ຽນຢ່າງຕັ້ງໜ້າທີ່ເດັດຂາດ ໃຫ້ຫຼາຍຂຶ້ນກວ່າເກົ່າ; ກອງປະຊຸມໄດ້ເປັນເອກະສັນຮັບຮອງເອົາທິດທາງ, ຄາດໝາຍ ແລະ ແຜນການວຽກງານຈຸດສຸມໃນ 5 ປີຕໍ່ໜ້າ (2025-2030) ເຊິ່ງມີເນື້ອໃນຕົ້ນຕໍຄື: ສືບຕໍ່ປະຕິບັດ 4 ແຜນງານ 29 ໂຄງການວຽກງານວິຊາສະເພາະ ເພື່ອຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ປອດໄພໂດຍພື້ນຖານ, ສ້າງສະພາບແວດລ້ອມເອື້ອອໍານວຍໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ບັນລຸຄາດໝາຍການພັດທະນາແບບຍືນຍົງຕາມເສັ້ນທາງກ້າວຂຶ້ນສັງຄົມນິຍົມ; ປັບປຸງກຳລັງປ້ອງກັນຄວາມສະຫງົບໃຫ້ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງດ້ານການຈັດຕັ້ງ ແລະ ມີແບບແຜນທັນສະໄໝ, ສ້າງອຸດສາຫະກຳປ້ອງກັນຄວາມສະຫງົບ ແລະ ຂຸດຄົ້ນແຫຼ່ງລາຍຮັບບົນພື້ນຖານທ່າແຮງບົ່ມຊ້ອນ ຂອງກົມກອງທ້ອງຖິ່ນ ຢ່າງເປັນເຈົ້າການ ແລະ ຖືກກົດໝາຍ, ຍົກສູງຄຸນະພາບວຽກງານເສນາທິການແຕ່ລະຂັ້ນ, ປະຕິບັດລະບອບປະຈຳການ ຮັບປະກັນມີກຳລັງ ແລະ ພາຫະນະກຽມພ້ອມແກ້ໄຂສະພາບການສຸກເສີນ, ເປັນເຈົ້າການພົວພັນ ແລະ ເຂົ້າຮ່ວມເຄື່ອນໄຫວກັບອົງການຕໍາຫຼວດ ຂອງບັນດາປະເທດເພື່ອນມິດຍຸດທະສາດ, ປະເທດໃກ້ຄຽງ ແລະ ອົງການອື່ນໆ ເພື່ອຍາດແຍ່ງເອົາການຮ່ວມມື ແລະ ບົດຮຽນເຕັກນິກວິຊາການ; ປະຕິບັດສັນຍາ, ສົນທິສັນຍາຕ່າງໆ ທີ່ກະຊວງປ້ອງກັນຄວາມສະຫງົບ ເປັນພາຄີ, ບັນດາບົດບັນທຶກການຮ່ວມມືໃຫ້ມີປະສິດທິຜົນສູງ.

ພ້ອມດຽວກັນນັ້ນ, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະບໍລິຫານງານພັກ ກະຊວງປ້ອງກັນຄວາມສະຫງົບ ຊຸດໃໝ່ ບົນພື້ນຖານການໃຊ້ສິດປະຊາທິປະໄຕ, ທັງຖືກຕ້ອງສອດຄ່ອງກັບມາດຖານ-ເງື່ອນໄຂ ທີ່ກຳນົດໄວ້ ເຊິ່ງມີຜູ້ຮັບສະໝັກເລືອກຕັ້ງ 31 ສະຫາຍ ແລະ ເລືອກໄດ້ 27 ສະຫາຍ. ຜ່ານການປ່ອນບັດ ແລະ ກອງປະຊຸມປະຖົມມະລຶກ ໄດ້ເອກະພາບເລືອກເອົາຄະນະປະຈໍາພັກກະຊວງ 9 ສະຫາຍ ປະກອບມີ: ສະຫາຍ ພົນເອກ ວິໄລ ຫຼ້າຄໍາຟອງ, ສະຫາຍ ພົນໂທ ຄໍາກິ່ງ ຜຸຍຫຼ້າມະນີວົງ, ສະຫາຍ ພົນຕີ ສຸລິນະ ແກ້ວປະເສີດ, ສະຫາຍ ພົນຈັດຕະວາ ນາງ ລີວົງ ລາວລີ, ສະຫາຍ ພົນຈັດຕະວາ ໜູຈອນ ກ້ອນທອງດໍາ, ສະຫາຍ ພົນຈັດຕະວາ ຄອນສະຫວັນ ສົມພາໄຊ, ສະຫາຍ ພົນຈັດຕະວາ ແອນ ອຸ່ນອານົງນຸດ, ສະຫາຍ ພົນຈັດຕະວາ ກອງສະຫວັດ ບຸນລ້ຽງ ແລະ ສະຫາຍ ພົນຈັດຕະວາ ປອ ສີສົມໄຊ ແກ້ວບຸນພັນ; ກອງປະຊຸມ ຍັງໄດ້ເອກະສັນຢ່າງສົມບູນເລືອກເອົາ ເລຂາ, ຮອງເລຂາ ປະກອບມີ: ສະຫາຍ ພົນເອກ ວິໄລ ຫຼ້າຄໍາຟອງ ເປັນເລຂາຄະນະບໍລິຫານງານພັກ ກະຊວງປ້ອງກັນຄວາມສະຫງົບ, ສະຫາຍ ພົນໂທ ຄໍາກິ່ງ ຜຸຍຫຼ້າມະນີວົງ ເປັນຮອງເລຂາ, ສະຫາຍ ພົນຕີ ສຸລິນະ ແກ້ວປະເສີດ ເປັນຮອງເລຂາ ແລະ ກອງປະຊຸມໄດ້ເປັນເອກະສັນເລືອກເອົາ ສະຫາຍ ພົນຈັດຕະວາ ນາງ ລີວົງ ລາວລີ ເປັນປະທານກວດກາພັກ, ສະຫາຍ ພົນຈັດຕະວາ ຊາຍຄອງ ເພັດຊະວົງ, ສະຫາຍ ພັນເອກ ສຸພັນທອງ ໄຄ້ຍະວົງ ແລະ ສະຫາຍ ພັນເອກ ສຸວັນ ທອງຈະເລີນ ເປັນຮອງປະທານກວດກາ. ພ້ອມນັ້ນ, ໃນກອງປະຊຸມ ຍັງໄດ້ປ່ອນບັດເລືອກເອົາຜູ້ແທນສົມບູນ ແລະ ສໍາຮອງ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ຈໍານວນ 20 ສະຫາຍ.