ສອງກອງທັບ ຈີນ-ລາວ ຄວນຈື່ຈໍາບົດຮຽນປະຫວັດສາດ ແລະ ກ້າວໄປຂ້າງໜ້າດ້ວຍຄວາມມຸ່ງໝັ້ນ ຮ່ວມກັນປະກອບສ່ວນໃຫ້ການປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນ

ຈີນ ແລະ ລາວ ເປັນປະເທດບ້ານໃກ້ເຮືອນຄຽງທີ່ມີສາຍພູສາຍນໍ້າຕິດຈອດກັນ, ທັງສອງປະເທດ ໄດ້ໃຫ້ການສະໜັບສະໜູນເຊິ່ງກັນ ແລະ ກັນ ໃນການຕໍ່ສູ້ເພື່ອເອກະລາດແຫ່ງຊາດ ແລະ ການປົດປ່ອຍປະເທດຊາດ, ມີການຮຽນຮູ້ແລກປ່ຽນບົດຮຽນໃນການປະຕິຮູບເປີດກວ້າງແບບໃໝ່, ຈິ່ງເຮັດໃຫ້ສາຍພົວພັນມິດຕະພາບທີ່ເປັນມູນເຊື້ອອັນດີງາມ ອັນງົດງາມຂອງການເປັນມິດສະຫາຍບ້ານໃກ້ເຮືອນຄຽງທີ່ດີ. ນັບມື້ນັບເຂັ້ມແຂງຍືນຍາວຍິ່ງໆຂຶ້ນ, ປະຊາຊົນທັງສອງປະເທດກໍໄດ້ສ້າງມິດຕະພາບອັນເລິກເຊິ່ງນີ້ໄວ້ ເປັນຂີດໝາຍໃນໜ້າປະຫວັດສາດ

ຜ່ານມາ, ທັງສອງປະເທດຕ່າງກໍໄດ້ຜ່ານຄວາມຫຍຸ້ງຍາກລຳບາກ, ເຄີຍຖືກຮຸກຮານ ຈາກປະເທດມະຫາອຳນາດ ແລະ ຖືກປົກຄອງ ຫຼື ແຊກແຊງກິດຈະການພາຍໃນ ຈາກພວກລ່າເມືອງຂຶ້ນ, ພ້ອມກັນນັ້ນກໍໄດ້ຕໍ່ສູ້ຢ່າງກ້າຫານເພື່ອເອກະລາດແຫ່ງຊາດ. ຫຼັງຈາກສົງຄາມຝິ່ນໃນປີ 1840, ປະເທດຈີນຄ່ອຍໆກາຍເປັນສັງຄົມແບບເຄິ່ງອານານິຄົມ-ເຄິ່ງສັກດີນາ, ພວກລ່າເມືອງຂຶ້ນໄດ້ບັງຄັບໃຫ້ປະເທດຈີນເຊັນສັນຍາທີ່ບໍ່ສະເໝີພາບ ເພື່ອແບ່ງແຍກແຜ່ນດິນ ແລະ ເອົາຄ່າທົດແທນ, ເຮັດໃຫ້ຊາດຈີນຕົກຢູ່ໃນສະພາບທຸກຍາກລຳບາກຢ່າງໜັກໜ່ວງ, ສ່ວນປະເທດລາວ ໃນປີ 1893 ຝຣັ່ງໄດ້ບັງຄັບໃຫ້ສະຫຍາມເຊັນ “ສົນທິສັນຍາຝຣັ່ງ-ສະຫຍາມ” ເຮັດໃຫ້ປະເທດລາວໄດ້ຖືກລວມເຂົ້າເປັນສະຫະພັນ ອິນດູຈີນຂອງຝຣັ່ງ, ນັບຕັ້ງແຕ່ນັ້ນມາປະຊາຊົນລາວໄດ້ຖືກກົດຂີຂູດຮີດເກັບພາສີອາກອນ ແລະ ໃຊ້ແຮງງານຢ່າງໜັກ ແລະ ໄດ້ຮັບການສຶກສາເປັນລະບົບຂ້າທາດ, ບາດແຜຄວາມເຈັບປວດນີ້ຍັງຝັງເລິກຢູ່ໃນຈິດໃຈຂອງປະຊາຊົນລາວ. ແຕ່ຍິ່ງມີການກົດຂີ່ຮ້າຍແຮງຂຶ້ນເທົ່າໃດ, ການມີໃຈລຸກຂຶ້ນຕໍ່ສູ້ຍິ່ງແຂງແກ່ນຂຶ້ນເທົ່ານັ້ນ. ພັກກອມມູນິດຈີນໄດ້ສ້າງຕັ້ງກອງທັບປະຊາຊົນເຕົ້າໂຮມນໍາພາປະຊາຊົນຈີນຕໍ່ສູ້ຢ່າງບໍ່ຍອມຈຳນົນ, ໄດ້ຮັບຊະນະຢ່າງຕໍ່ເນື່ອງ ໃນການຕໍ່ຕ້ານກັບສັດຕູຜູ້ເຂົ້າມາຮຸກຮານ, ນອກນັ້ນຍັງໄດ້ຮັບໄຊຊະນະອັນຍິ່ງໃຫຍ່ໃນສົງຄາມປະຕິວັດທີ່ດິນ, ສົງຄາມຕ້ານຟາຊິສຍີ່ປຸ່ນ ແລະ ສົງຄາມປົດປ່ອຍ; ໃນທີ່ສຸດກໍໄດ້ສະຖາປະນາສາທາລະນະລັດປະຊາຊົນຈີນຂຶ້ນໃນປີ 1949. ສ່ວນພັກປະຊາຊົນປະຕິວັດລາວໄດ້ນໍາພາປະຊາຊົນລາວລຸກຮື້ຂຶ້ນລົບລ້າງລະບອບອານານິຄົມ, ໄດ້ຮັບເອກະລາດປົດປ່ອຍຊາດ, ໄດ້ຮັບໄຊຊະນະໃນສົງຄາມຕ້ານຈັກກະພັດອະເມລິກາທີ່ແສນຫຍຸ້ງຍາກລຳບາກ ດ້ວຍການຊ່ວຍເຫຼືອຈາກບັນດາປະເທດເພື່ອນມິດ ເຊັ່ນ ສປ ຈີນ ເປັນຕົ້ນ, ຈົນສາມາດ ປະກາດສ້າງຕັ້ງສາທາລະນະລັດ ປະຊາທິປະໄຕ ປະຊາຊົນລາວ ໃນປີ 1975. ເພາະສະນັ້ນ, ແຕ່ລະປີໃນໂອກາດບຸນໄຫວ້ບັນພະບູລຸດ, ຈີນ ແລະ ລາວຈະໄດ້ສົ່ງຜູ້ແທນໄປໄຫວ້ອາໄລສຸສານນັກຮົບທີ່ເສຍສະຫຼະເພື່ອເປັນການສະແດງຄວາມເຄົາລົບຕໍ່ຜູ້ເສຍສະຫຼະຊີວິດເພື່ອຊາດ, ສືບຕໍ່ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອມາແຕ່ ການປະຕິວັດ ແລະ ເປັນການຫວນຄືນຄວາມຫຍຸ້ງຍາກລຳບາກໃນການຕໍ່ສູ້ຍາດແຍ່ງໄດ້ຄວາມສັນຕິພາບ. ເສັ້ນທາງການກ້າວໄປສູ່ເອກະລາດແຫ່ງຊາດຂອງຈີນ ແລະ ລາວແມ່ນບົດກະວີທີ່ຂຽນດ້ວຍເລືອດ ແລະ ໄຟ. ປະຫວັດສາດດັ່ງກ່າວບໍ່ພຽງແຕ່ໄດ້ເສີມຂະຫຍາຍນໍ້າໃຈຕໍ່ສູ້ອັນເດັດດ່ຽວໜຽວແໜ້ນ ຂອງສອງປະເທດເທົ່ານັ້ນ, ຫາກຍັງເປັນພື້ນຖານອັນໜັກແໜ້ນເພື່ອໃຫ້ຮ່ວມມືກັນສ້າງອະນາຄົດທີ່ດີງາມອີກດ້ວຍ.

ບົດຮຽນປະຫວັດສາດທີ່ຄ້າຍຄືກັນຂອງສອງຊາດນັ້ນໄດ້ເຊື່ອມຕໍ່ນໍ້າໃຈຂອງປະຊາຊົນຈີນ-ລາວ ຢ່າງໃກ້ຊິດ, ເຮັດໃຫ້ປະຊາຊົນສອງຊາດມີຄວາມເຂົ້າໃຈ ແລະ ສະໜັບສະໜູນເຊິ່ງກັນ ແລະ ກັນ. ນັບຕັ້ງແຕ່ສ້າງສາຍພົວພັນທາງການທູດໃນວັນທີ 25 ເມສາ 1961 ໂດຍສະເພາະຫຼັງຈາກສ້າງເປັນຄູ່ຮ່ວມຍຸດທະສາດຮອບດ້ານໃນປີ 2009, ພາຍໃຕ້ການນໍາພາດ້ານຍຸດທະສາດຂອງຜູ້ນຳສູງສຸດຂອງສອງພັກ-ສອງປະເທດ, ສາຍພົວພັນຈີນ-ລາວໄດ້ກ້າວໜ້າຢ່າງວ່ອງໄວ, ການຮ່ວມມືໃນທຸກຂົງເຂດ ລ້ວນແລ້ວແຕ່ໄດ້ປະສົບຜົນສໍາເລັດອັນໃຫຍ່ຫຼວງ, ການກໍ່ສ້າງຄູ່ຮ່ວມຊະຕາກຳລາວ-ຈີນ ໄດ້ກ້າວເຂົ້າສູ່ລວງເລິກ ແລະ ປະກົດຜົນເປັນຈິງຢ່າງບໍ່ຢຸດຢັ້ງ ເຊິ່ງໄດ້ເປັນແບບຢ່າງທີ່ດີ ໃຫ້ແກ່ການກໍ່ສ້າງປະຊາຄົມຮ່ວມກັນຂອງມວນມະນຸດ. ສປ ຈີນ ໄດ້ກາຍເປັນປະເທດຜູ້ລົງທຶນຕ່າງປະເທດອັນດັບ 1 ແລະ ຄູ່ຄ້າຫຼັກຂອງລາວຕິດຕໍ່ກັນຫຼາຍປີ. ໃນປີ 2024 ມູນຄ່າການຄ້າຈີນ-ລາວ ໄດ້ບັນລຸ 8,231 ລ້ານໂດລາສະຫະລັດ, ເພີ່ມຂຶ້ນ 15.9% ເມື່ອທຽບໃສ່ປີກ່ອນ, ສ້າງສະຖິຕິສູງສຸດໃນສັງກາດໃໝ່. ຫຼາຍກວ່າ 80% ຂອງຜະລິດຕະພັນກະສິກຳຂອງລາວໄດ້ສົ່ງອອກໄປຈຳ

ໜ່ວຍຢູ່ປະເທດຈີນ ເຊິ່ງສະແດງໃຫ້ເຫັນວ່າຄວາມ ເຊື່ອມໂຍງທາງເສດຖະກິດລະຫວ່າງສອງປະເທດເພີ່ມຂຶ້ນຢ່າງຕໍ່ເນື່ອງ. ນອກນັ້ນ, ການເປີດນໍາໃຊ້ຢ່າງ ເປັນທາງການຂອງທາງລົດໄຟລາວ-ຈີນ ກໍເປັນຂີດໝາຍສໍາຄັນທາງປະຫວັດສາດ, ຊ່ວຍໃຫ້ປະເທດລາວຫັນຈາກປະເທດທີ່ບໍ່ມີທາງອອກສູ່ທະເລ ກາຍເປັນປະເທດເຊື່ອມໂຍງເຊື່ອມຈອດ. ນັບຕັ້ງແຕ່ການເປີດນໍາໃຊ້ໃນເດືອນ ທັນວາ 2021 ຈົນເຖິງເດືອນ ມິຖຸນາ 2025, ທາງລົດໄຟລາວ-ຈີນໄດ້ຂົນສົ່ງຜູ້ໂດຍສານຫຼາຍກວ່າ 54 ລ້ານເທື່ອຄົນ ແລະ ຂົນສົ່ງສິນຄ້າຫຼາຍກວ່າ 62.8 ລ້ານໂຕນ, ແຜ່ຂະຫຍາຍໄປຍັງ 18 ປະເທດ ແລະ ບັນດາເຂດແຄວ້ນ ລວມທັງປະເທດໄທ ແລະ ສິງກະໂປ, ໄດ້ສ້າງ “ເສັ້ນທາງທອງຄໍາ” ສາກົນ ອັນສະດວກສະບາຍ ຢ່າງມີປະສິດທິຜົນ. ນອກຈາກນັ້ນ ກໍຍັງມີການຮ່ວມມືໃນຫຼາຍຂົງເຂດ ເຊັ່ນ ທາງດ່ວນວຽງຈັນ-ວັງວຽງ ລາວ-ຈີນ, ໄຟຟ້າ, ພະລັງງານ, ບໍ່ແຮ່ ແລະ ຂົງເຂດອື່ນໆ ໄດ້ສືບຕໍ່ກ້າວເຂົ້າສູ່ລວງເລິກ. ໂຄງການຊີວິດການເປັນຢູ່ຂອງປະຊາຊົນຈໍານວນໜຶ່ງເຊັ່ນ: ໂຮງໝໍຫຼວງພະບາງ, ໂຮງໝໍມະໂຫສົດ ແລະ ວິທະຍາໄລເຕັກນິກວິຊາຊີບການລົດໄຟ ກໍໄດ້ຮັບການເປີດນໍາ ໃຊ້ ເຊິ່ງໄດ້ມີບົດບາດອັນຕັ້ງໜ້າເຂົ້າໃນການຮັດແໜ້ນມິດຕະພາບສາຍພົວພັນຈີນ-ລາວ ໃຫ້ນັບມື້ນັບແໜ້ນແຟ້ນ ແລະ ນໍາເອົາຄວາມຜາສຸກໃຫ້ແກ່ປະຊາຊົນສອງປະເທດ.

ການຮ່ວມມືດ້ານການທະຫານກໍມີຜົນສໍາເລັດຢ່າງສະຫງ່າຜ່າເຜີຍ. ໃນຊຸມປີມໍ່ໆມານີ້, ພາຍໃຕ້ ການຊີ້ນໍາດ້ານຍຸດທະສາດຂອງການນໍາຂັ້ນສູງຂອງສອງພັກ ແລະ ສອງປະເທດ, ການຮ່ວມມືລະຫວ່າງ ກອງທັບຈີນ-ລາວ ໄດ້ພັດທະນາຢ່າງກວ້າງຂວາງ, ເລິກເຊິ່ງ ແລະ ມີລະດັບສູງຂຶ້ນເລື້ອຍໆ ໂດຍສະເພາະໄດ້ຮັບໝາກຜົນຢ່າງຕັ້ງໜ້າໃນການແລກປ່ຽນ ແລະການຮ່ວມມື ໃນຂົງເຂດການຊ້ອມຮົບຮ່ວມ, ການບໍລິການດ້ານການແພດ, ການກໍ່ສ້າງບຸກຄະລາກອນ ແລະ ການໂຄສະນາຂ່າວການທະຫານ. ການຊ້ອມຮົບຮ່ວມກັນ ພາຍໃຕ້ຫົວຂໍ້ “ຂະບວນລົດໄຟແຫ່ງສັນຕິພາບ” ແລະ “ໂລ້ກໍາບັງມິດຕະພາບ” ລະຫວ່າງກອງທັບສອງປະເທດ ໄດ້ຮັດແໜ້ນຄວາມໄວ້ເນື້ອເຊື່ອໃຈເຊິ່ງກັນ ແລະ ກັນທາງຍຸດທະສາດ ແລະ ການຮ່ວມມືທີ່ແທ້ຈິງລະຫວ່າງກອງທັບສອງປະເທດ, ມີຄວາມໝາຍຄວາມສໍາຄັນຢ່າງຍິ່ງ ແລະ ຈະສົ່ງຜົນກະທົບໃນໄລຍະຍາວ ໃນການຍົກລະດັບຄວາມສາມາດຂອງການສູ້ຮົບຮ່ວມກັນເພື່ອປ້ອງກັນປະເທດ ແລະ ປົກປັກຮັກສາຄວາມສະຫງົບປອດໄພ ແລະ ສະຖຽນລະພາບຂອງພາກພື້ນ.

ປີນີ້ແມ່ນຄົບຮອບ 80 ປີແຫ່ງໄຊຊະນະໃນສົງຄາມຕໍ່ສູ້ຕ້ານຟາຊິສຍີ່ປຸ່ນຂອງປະຊາຊົນຈີນ ແລະ ຊະນະການຕໍ່ສູ້ຕ້ານຟາຊິສທົ່ວໂລກ, ລັດຖະບານຈີນຈະຈັດພິທີລະນຶກຢ່າງສະຫງ່າຜ່າເຜີຍ. ການຈັດພິທີໃນຄັ້ງນີ້ແມ່ນເພື່ອຮ່ວມແຮງຮ່ວມໃຈເພື່ອສັນຕິພາບ, ສະທ້ອນໃຫ້ເຫັນເຖິງພະລັງອໍານາດແຫ່ງ ສັນຕິພາບ, ສະແດງໃຫ້ເຫັນເຖິງການທຸ່ມເທປະກອບສ່ວນອັນໃຫຍ່ຫຼວງຂອງປະຊາຊົນຈີນ ໃນການຕໍ່ສູ້ຈົນຊະນະການຕ້ານຟາຊິສທົ່ວໂລກ ແລະ ເປັນການປະກາດໃຫ້ເຫັນເຖິງຈຸດຢືນ ແລະ ຄວາມມຸ່ງໝັ້ນຂອງປະຊາຊົນຈີນ ໃນການກ້າວເດີນຕາມເສັ້ນທາງການພັດທະນາຢ່າງສັນຕິ ແລະ ປົກປັກຮັກສາສັນຕິພາບຂອງໂລກຢ່າງເດັດດ່ຽວ. ບົດຮຽນອັນລໍ້າຄ່າຈາກສົງຄາມໂລກຄັ້ງທີສອງຍັງບໍ່ໄກ, ປະຫວັດສາດບໍ່ຄວນຖອຍຫຼັງ ແຕ່ຄວນກ້າວໜ້າ; ໂລກບໍ່ຄວນແຕກແຍກ ແຕ່ຄວນສາມັກຄີກັນ. ປະຊາຊົນທົ່ວໂລກຜູ້ຮັກສັນຕິພາບຕ້ອງຈື່ຈຳປະຫວັດສາດທີ່ຂຽນດ້ວຍເລືອດ ແລະ ການເສຍສະຫຼະ ຊີວິດ, ຕັ້ງໜ້າປົກປັກຮັກສາໝາກຜົນຂອງໄຊຊະນະການຕ້ານຟາຊິສ ແລະ ລະບົບສາກົນຫຼັງສົງຄາມ. ສປ ຈີນຍຶດໝັ້ນແນວຄິດໃນການກໍ່ສ້າງປະຊາຄົມຮ່ວມກັນຂອງມວນມະນຸດ, ປະຕິບັດຂໍ້ສະເໜີດ້ານຄວາມປອດໄພໂລກຢ່າງຮອບດ້ານ, ມຸ່ງໝັ້ນໃນການຮັກສາສັນຕິພາບຂອງໂລກ ຜ່ານຄວາມສາມັກຄີ ແລະ ການຮ່ວມມືໃນການສະແຫວງຫາຄວາມປອດໄພຮ່ວມກັນ ແລະ ຈະສືບຕໍ່ຮ່ວມມືກັບທຸກປະເທດໃນການສ້າງໂລກທີ່ສວຍງາມ ທີ່ມີສັນຕິພາບຢ່າງຍືນຍົງ ແລະ ມີຄວາມປອດໄພແກ່ທຸກຄົນ. ແຕ່ແນວໃດກໍດີ, ໃນຂະນະທີ່ທົ່ວໂລກພວມມີການປ່ຽນແປງຢ່າງໄວວາ ແບບບໍ່ເຄີຍມີມາກ່ອນໃນ ຮອບ 100 ປີ, ການປະທະກັນດ້ວຍຂໍ້ຂັດແຍ້ງ ແລະ ຄວາມບໍ່ສະຫງົບຢູ່ທ້ອງຖິ່ນໄດ້ເກີດຂຶ້ນເລື້ອຍໆ ແລະ ສະພາບແວດລ້ອມດ້ານຄວາມປອດໄພອ້ອມຂ້າງກໍມີຄວາມສັບສົນຍິ່ງຂຶ້ນ. ສອງກອງທັບຈີນ-ລາວພວກເຮົາຄວນສືບຕໍ່ຮັກສາການພົບປະແລກປ່ຽນຂັ້ນສູງລະຫວ່າງສອງກອງທັບ ແລະ ເພີ່ມທະວີ ການພົວພັນຢ່າງແໜ້ນແຟ້ນໃນການສື່ສານດ້ານຍຸດທະສາດ. ຄວນນໍາໃຊ້ກົນໄກການປະຊຸມຂອງ ຄະນະກໍາມະການປະສານງານການຮ່ວມມືດ້ານການທະຫານໃຫ້ເກີດມີຜົນປະໂຫຍດສູງສຸດ ເພື່ອວາງແຜນລວມ ແລະ ປະສານງານກ່ຽວກັບການແລກປ່ຽນຮ່ວມມືໃນຂົງເຂດຕ່າງໆລະຫວ່າງສອງກອງທັບ. ຄວນລົງເລິກການແລກປ່ຽນຕົວຈິງໃນຂົງເຂດວຽກງານການເມືອງລະຫວ່າງກອງທັບສອງປະເທດ, ເພີ່ມທະວີການຊ້ອມຮົບຮ່ວມ ແລະ ການຝຶກອົບຮົມລະຫວ່າງສອງກອງທັບ. ຈັດຕັ້ງການພົບປະແລກປ່ຽນມິດຕະພາບກ່ຽວກັບການປ້ອງກັນປະເທດຢູ່ເຂດຊາຍແດນ ແລະ ຮ່ວມກັນຮັກສາຄວາມໝັ້ນຄົງ, ສະຖຽນລະພາບຢູ່ລຽບຊາຍແດນ. ສືບຕໍ່ດໍາເນີນການຮ່ວມມືໃນຂົງເຂດການແລກປ່ຽນ ລະຫວ່າງສະຖາບັນການສຶກສາ, ການພັດທະນາບຸກຄະລາກອນ, ການແລກປ່ຽນຢ້ຽມຢາມເຊິ່ງກັນ ແລະ ກັນລະຫວ່າງນາຍທະຫານໄວໜຸ່ມ-ໄວກາງ ລວມທັງການຄົ້ນຄວ້າດ້ານວິຊາການ. ການຮ່ວມມືທີ່ເລິກເຊິ່ງ ແລະ ເສີມສ້າງມິດຕະພາບດັ່ງເດີມລະຫວ່າງກອງທັບຂອງສອງປະເທດ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ, ສະແດງໃຫ້ເຫັນຄວາມມຸ່ງໝັ້ນຂອງກອງທັບຈີນ-ລາວໃນການຮັກສາຄວາມປອດໄພ ແລະ ສະຖຽນລະພາບຂອງພາກພື້ນ.

ກອງທັບຈີນ-ລາວ ຕ່າງກໍແບກຫາບພາລະກິດອັນສູງສົ່ງ ໃນການປົກປັກຮັກສາຄວາມ

ໝັ້ນຄົງ, ສະຖຽນລະພາບ ແລະ ຜົນປະໂຫຍດການພັດທະນາຂອງປະເທດພວກເຮົາທັງສອງ. ເສັ້ນທາງຂ້າງໜ້າ ແມ່ນຍາວໄກ ແລະ ເຕັມໄປດ້ວຍຄວາມທ້າທາຍ. ຂໍໃຫ້ພວກເຮົາຈື່ຈຳປະຫວັດສາດ, ໃຫ້ຄວາມສໍາຄັນແກ່ຊ່ວງເວລາປັດຈຸບັນ, ຈັບມືກັນກ້າວໄປຂ້າງໜ້າ ໂດຍບໍ່ຢ້ານກົວຕໍ່ອຸປະສັກໃດໆ. ຂໍໃຫ້ພວກເຮົາຮ່ວມມືກັນໃນດ້ານການທະຫານໃຫ້ແໜ້ນແຟ້ນຂຶ້ນຕື່ມ ເພື່ອປ້ອງກັນຄວາມໝັ້ນຄົງໃນພາກພື້ນ, ສືບຕໍ່ປະກອບສ່ວນອັນໃໝ່ໆ ໃນການຊຸກຍູ້ການສ້າງຄູ່ຮ່ວມຊະຕາກຳຈີນ-ລາວ ໃຫ້ຍືນຍົງທະນົງແກ່ນ ກໍຄື ໃນການຮັກສາສັນຕິພາບແລະ ສະຖຽນລະພາບ, ທັງນີ້ ກໍເພື່ອຮ່ວມກັນສ້າງອະນາຄົດອັນສີວິໄລ ໃຫ້ແກ່ສອງປະເທດຈີນ-ລາວ ລາວ-ຈີນ.

ຂຽນໂດຍ: ພັນເອກພິເສດ ຫຼີປີງ ທູດທະຫານປະຈໍາສະຖານເອກອັກຄະລັດຖະທູດ ສປ ຈີນ ປະຈໍາ ສປປ ລາວ